Котаў пра «пакаянныя» відэа ад зборнай Беларусі на АГ-2022: Мяне ўжо анічога не здзіўляе

Экс-генсек НАК - пра атмасферу ў зборнай.

Экс-генсек НАК Анатоль Котаў распавёў «Солидарности», што ён думае пра атмасферу ў зборнай Беларусі на АГ-2022.

- Псіхалагічны клімат у зборнай - штука тонкая і складаная. Як паўплывае на яго, і, магчыма, на вынікі іншых спартоўцаў разуменне: не апраўдаеш ускладзеных надзей - давядзецца апраўдвацца на ўсю краіну?

- Нічога добрага ў плане псіхалагічнага клімату, безумоўна, у каманду гэта не прыносіць, асабліва для тых, на каго разлічваюць і чакаюць вынікаў. Ізаляваць спартоўцаў ад навін, ад агульнай нервовасці і трывожнасці немагчыма.

Мяне ўжо анічагуткі не здзіўляе з пункту гледжання паводзін тых, хто адказвае за мэнэджмент, лагістыку і стварэнне камфортных умоў у беларускай камандзе. Камфортнымі такія ўмовы назваць немагчыма.

Яшчэ з летняй Алімпіяды ў Токіа заўзятары прымецілі некаторыя містычныя моманты няўдач беларускай зборнай: то ў трохборцаў захварэлі коні, то ў траіх лыжнікаў станоўчы ПЦР-тэст, то габарыт, які не закрыўся, фактычна пазбавіў біятланістку Алімбекаву медалю. Зрэшты, таму ёсць простыя тлумачэнні без забабонаў:

- Коні наогул дрэнна пераносяць перамяшчэнне на доўгія адлегласці, так што нічога дзіўнага, падобныя казусы былі на папярэдніх Алімпіядах. І некалькі разоў, нягледзячы на наяўнасць ліцэнзій, прымалася рашэнне не везці беларускіх трохборцаў якраз з меркаванняў шкоды для здароўя коней, тым больш, што і на прызавыя месцы разлічваць асабліва не даводзілася.

Усё астатняе - габарыты, страты секунд, міліметраў і гэтак далей - нервы. Але гэта спорт, і на спаборніцтвах усе ў роўных умовах.

Хаця асабіста я сумняваюся, што гісторыя з «пакаяннымі відэа» фрыстайлістаў паслужыць нейкім стымулам для каманды. Стымуляванне павінна мець па большай частцы пазітыўны характар, - сказаў Котаў.