Грэцыя і Балгарыя ўвялі ў дзеянне трубаправод, каб зменшыць залежнасць ад расейскага газу
4- 8.07.2022, 21:01
- 4,926
Раней Балгарыя задавальняла больш за 90% сваіх патрэб імпартам расейскага газу.
Грэцыя і Балгарыя адзначылі заканчэнне будаўніцтва газаправода паміж дзвюма краінамі. Гэта можа істотна зменшыць залежнасць Еўропы ад расейскага газу.
Пра гэта паведамляе Reuters.
Трубаправод даўжынёй больш за 180 кіламэтраў праходзіць паміж паўночна-ўсходнім грэцкім местам Камаціні ды балгарскім местам Стара-Загорай і злучае газатранспартныя сістэмы Грэцыі ды Балгарыі. Ён забяспечыць гэтым краінам ды іх суседзям доступ да новых сеткавых злучэнняў.
Interconnector Greece-Bulgaria дазволіць атрымліваць газ з азербайджанскага радовішча Шах-Дэніз, а таксама звадкаваны газ з розных крыніц праз тэрміналы ў Грэцыі.
Даўней Балгарыя задавальняла больш за 90% сваіх патрэб імпартам расейскага газу. Пасля адмовы плаціць Расеі ў рублях "Газпром" цалкам прыпыніў пастаўкі газу кампаніі "Булгаргаз". Тады Балгарыя пачала пробныя пастаўкі газу з Азербайджана.
Грэцыя задавальняла блізу 40% гадавой патрэбы расейскім газам. Заканчэнне будаўніцтва газаправода адкладалася дзеля затрымкі імпарту матэрыялаў падчас пандэміі каранавірусу. Будаўніцтва газаправода пачалося ў траўні 2019 года ў Балгарыі. Тады планавалася, што будаўнічыя работы закончацца да канца лістапада 2020 года.