Паджылы грамадзянін Ізраіля гераічна выратаваў сваю сям'ю ад тэрарыстаў, ахвяраваўшы сабой

У доме знаходзілася яго жонка, дзве дачкі і ўнук.

У Ізраілі Шлома Рон, паджылы мужчына з кібуца Нахаль Оз, выратаваў ад тэрарыстаў ХАМАС сваю сям'ю, ахвяраваўшы сабой. Яго гісторыю распавёў сёння, 21 кастрычніка, адвакат Даніэль Хаклай, пішуць «Детали».

7 кастрычніка Шлома хутка зразумеў, што тэрарысты ўжо ў кібуцы. У доме знаходзілася яго жонка Хана, дзве дачкі і ўнук, якія прыехалі на свята. Сям'я схавалася ва ўмацаваным пакоі («мамадзе»).

Шлома зразумеў, што тэрарысты могуць знайсці іх там, выйшаў у гасціную дома і сеў там адзін. Ён разлічваў, што баевікі, убачыўшы паджылага чалавека, падумаюць, што ён жыве адзін, і не будуць абшукваць дом.

Так і здарылася. Хамаснікі ўварваліся ў дом і забілі бацьку сямейства, але не сталі абшукваць іншыя пакоі.

«Шлома Рон не быў узброены. Ён не служыў у спецназе ці дзе-небудзь яшчэ. Ён не быў генералам запасу. І ўжо сапраўды не быў дасведчаным байцом, не навучаўся ніякім адзінаборствам. Шлома быў проста чалавекам сталага веку, даволі хворым, з мілай усмешкай і добрым позіркам. Шлома быў мяккім і далікатным чалавекам, які любіў тэатр, музыку і кнігі. Добры і далікатны мужчына, які любіў Хану і іх дачок і ўнука.

Проста хворы стары. Проста мяккі і далікатны ізраільцянін, з вусамі, у акулярах. Ізраільцянін, які любіў сваю жонку, дачок і маленькага ўнука. Але Шлома Рон - герой Ізраіля», - распавёў Даніэль Хаклай.

На днях Шлома Рон быў пахаваны ў Квуцат Кінерэт, кібуцы на поўначы Ізраіля, побач з яго ўлюбёнымі паэткамі - Рахель і Наомі Шэмэр.