«Чаму не патэлефанавалі нам?»: Бацькі ў шоку ад таго, што адбываецца ў школах

У Магілёве надумалі праверыць заплечнікі дзяцей у школе.

На днях у адной са школаў Магілёва ў некаторых старшакласнікаў «супрацоўнікі ў форме» правяралі заплечнікі. Пра гэта ў рэдакцыю «Люстэрка» паведамілі бацькі аднаго са школьнікаў. Іх абурыла, што нехта можа глядзець асабістыя рэчы дзяцей без дазволу іх законных прадстаўнікоў.

Бацькі: «Мы ў сям'і былі ў шоку, сядзелі на эмоцыях»

Паводле словаў бацькоў, днямі іх дзіця заўважыла ў школе «супрацоўнікаў у форме». Прадстаўнік якой сілавой структуры гэта быў, ён не ведае.

– Дзіця расказвала, што праверкі закранулі вучняў 8–11 класаў. Да кагосьці заходзілі ў клас падчас урока, да кагосьці ў распранальню пасля фізкультуры, кагосьці глядзелі на калідоры на перапынку. Недзе ў клас заходзілі і без праверкі сыходзілі. Як вызначалі, каго глядзець, не ведаем, можа, знешні выгляд меў значэнне, – мяркуюць бацькі. – Як ішлі праверкі ў іншых, нам не вядома. У дзіцяці папрасілі адкрыць заплечнік і паглядзелі. У кішэні не лезлі, прасілі яго самога дастаць тое, што ў іх было.

Сярод правяральнікаў, кажуць суразмоўцы, іх дзіця бачыла «пяць супрацоўнікаў у форме» і чула, што быў вахцёр.

– Ніхто не казаў, з чым гэта звязана. Потым ужо высветлілася, што шукаюць вэйпы (электронныя цыгарэты. – Заўвага. рэд.). З таго, што гавораць у школе, у кагосьці нешта знайшлі, – дзеляцца пачутым бацькі. – Думаю, гэта былі прафілактычныя мерапрыемствы. Дзіця прыйшло дахаты ў жаху, кажа, ніколі такога не было. Мы ў сям'і былі ў шоку, сядзелі на эмоцыях. Чаму бацькоў не выклікалі?

Школа: «Яны ж не даглядаюць, яны просяць: “Адкрыйце, калі ласка, ваш заплечнік ці асабістыя рэчы”»

Журналісты патэлефанавалі ў тую самую школу Магілёва як бацькі старшакласнікаў. У гутарцы з некалькімі супрацоўнікамі інфармацыю пра нейкія масавыя праверкі не пацвердзілі.

Аднак у адміністрацыі патлумачылі, што ў школе ёсць супрацоўнікі пазаведамаснай аховы (гаворка пра супрацоўнікаў Дэпартамента аховы МУС), якія сочаць за парадкам ва ўстанове. За тым, што адбываецца ў навучальнай установе, яны назіраюць праз відэакамеры. І калі заўважылі нешта падазронае ці ім нехта нешта расказаў, могуць папрасіць дзіця паказаць заплечнік. Пры гэтым, падкрэслілі ў навучальнай установе, дзяцей «не мацаюць і не надглядаюць».

– Яна не правярала (гаворка пра супрацоўніцу Дэпартамента аховы. – Заўв. рэд.), а, мусіць, проста папрасіла адкрыць [заплечнік]. Гэта ўваходзіць у іх службовыя абавязкі, – расказалі ў адміністрацыі школы. – У нас, у настаўнікаў, пазаведамасная ахова на тэрыторыі таксама можа папрасіць адкрыць асабістыя рэчы. Супрацоўнікі ж не надглядаюць, а просяць: «Адкрыйце, калі ласка, ваш заплечнік ці асабістыя рэчы». Маюць на гэта поўнае права. Яны адносяцца да праваахоўных органаў, у іх ёсць свае правілы. Яны нічога не парушаюць.

На падставе якога дакумента супрацоўнікі дэпартамента аховы могуць правяраць заплечнікі вучняў, у адміністрацыі не адказалі. Пытанню, чаму перад праверкай не патэлефанавалі бацькам як законнымі прадстаўнікамі дзіцяці, нават здзівіліся:

– Калі ён прыйшоў у школу, яго могуць спыніць на калідоры, папрасіць паказаць рэчы. <…> Гэта ж ахова, у іх ёсць свае правілы і абавязкі.

Пры гэтым у адміністрацыі ўдакладнілі, калі ў школьніка знаходзяць нешта забароненае, з бацькамі звязваюцца.

У адміністрацыі адзначылі, што дзеці прыносяць у школу «вельмі шмат усялякага глупства». Сярод гэтага – вэйпы.

– Яны прыраўноўваюцца да цыгарэтаў, а тэрыторыя школы – зона вольная ад палення, – расказалі ў адміністрацыі. – І гэта пастаноўка на ўлік (пазней юрыстка патлумачыла, што за вэйпы ў заплечніку на ўлік не ставяць, для гэтага павінны быць больш сур'ёзныя падставы. – Заўвага. рэд.). Гэта для бяспекі дзяцей найперш. Каб потым не было нюансаў, каб у першую чаргу дзіця не атруцілася тым, што яно выпаліць, і засталося жывое і здаровае. Дзе гарантыя, што не будзе алергіі ці яшчэ нечага?

У навучальнай установе запэўнілі, што «тут дзіця ніхто не пакрыўдзіць», і папрасілі лішні раз паразмаўляць з дзіцем, даведацца, ці не хавае ён штосьці ад бацькоў.