Кангрэсмены падштурхоўваюць Белы дом паскорыць пастаўку зброі Украіне для контрнаступлення

Сярод пытанняў – перадача Украіне знішчальнікаў F-16 і ракет ATACMS.

Група рэспубліканцаў ЗША хоча падштурхнуць Белы дом да больш хуткай падачы Украіне зброі, неабходнай для паспяховага контрнаступлення, паведамляе «Голас Амерыкі». Дыскусіі ідуць вакол таго, які з двух відаў зброі – F-16 або зброя большага радыусу дзеяння – з'яўляецца больш актуальным.

На думку рэспубліканца ад штата Тэхаса Кіта Сэлфа, на гэтым этапе вайны Украіне больш патрэбныя дальнабойныя ракеты, чым знішчальнікі. «Я не разумею, чаму мы не даем ім балістычныя ракеты ATACMS, гэта могуць быць ракеты першага блока, ці другога. Гэтыя ракеты выпускаюцца з установак HIMARS, якія ўкраінцы і так ужо маюць», – падзяліўся ён у каментары выданню.

У той час як рэспубліканка Эн Вагнер выказала незадаволенасць у цэлым павольнымі тэмпамі паставак узбраення. Акрамя таго, з яе слоў, краіны NATO павінны прымаць больш актыўны ўдзел у дапамозе Украіне і ў цэлым у забеспячэнні Альянсу: «Кангрэс выдзеліў на гэта сродкі шмат, шмат месяцаў таму. Мы павінны даць Украіне ўсю зброю і інструменты, якія ім патрэбны, каб атрымаць перамогу над Пуціным».

А кангрэсмен ад дэмакратаў Джым Коста назваў даванне Украіне знішчальнікаў пасля трэніроўкі толькі пытаннем часу. «Я рады бачыць, што прэзідэнт Байдэн даў зялёнае святло для трэніроўкі ўкраінскіх лётчыкаў, а таксама супрацоўнічае з нашымі саюзнікамі па NATO. Між іншым, з Нідэрландамі і Даніяй, у распараджэнні якіх літаральна сотні знішчальнікаў F-16. Гэтыя краіны якраз у працэсе пераходу на найноўшы тып знішчальнікаў F-357, таму зараз мы бачым прасоўванне з самалётамі F-16, якія, я спадзяюся, у хуткім часе будуць даступныя для Украіны», – адзначыў кангрэсмен.

Адносна ж ракетаў вялікай далёкасці, Коста лічыць, што Кангрэс павінен працягнуць ціск на адміністрацыю Байдэна на двухпартыйным узроўні і ў гэтым пытанні таксама.

- Увесь гэты час мы спрабуем паўплываць на гэтую адміністрацыю і супрацоўнічаць з прэзідэнтам на двухпартыйным узроўні. І мы бачылі вынік гэтай працы на прыкладзе ўсталёвак HIMARS. Таксама мы бачылі гэта на прыкладзе паставак танкаў не толькі са Злучаных Штатаў, але і ад краін-саюзнікаў па NATO, – падсумаваў Коста.