Пуцін сутыкнуўся з трыма змовамі ў Крамлі

Ён паранаідальна баіцца замаху на сваю ўладу.

Расейскі лідар паранаідальна баіцца замаху на сваю ўладу.

Прэзідэнт Расеі Пуцін за гады кіравання ў Крамлі нібыта прадухіліў тры змовы і зрушыў з кіроўных пасадаў сваіх верагодных канкурэнтаў. Пра гэта паведамляе выданне "Праект" у расследаванні, апублікаваным у пятніцу, 9 чэрвеня, піша dw.com. Хоць няма звестак пра тое, ці існавалі гэтыя змовы насамрэч, Пуцін успрымаў іх менавіта так, адзначае выданне.

Першым чалавекам, якога, паводле інфармацыі "Праекту", Пуцін зняў з пасады праз падазрэнне ў змове, стаў Міхаіл Касьянаў. Пасля таго як Касьянаў выступіў у падтрымку Міхаіла Хадаркоўскага, ён быў адпраўлены ў адстаўку з пасады прэм'ер-міністра разам з усім кабінетам. Рэальнай прычынай адстаўкі магло стаць падазрэнне Пуціна, што той можа паспрабаваць заняць ягонае месца. Выданне адзначае, што пасля таго, як Касьянаў сышоў у несістэмную апазіцыю, Пуцін стаў не проста здымаць з пасадаў патэнцыйных "змоўнікаў", а прызначаць іх на высокія, але непублічныя пасады.

Так, сцвярджаецца ў расследаванні, адбылося з Міхаілам Фрадковым, якога Пуцін незадоўга да прэзідэнцкіх выбараў 2008 года зняў з пасады кіраўніка ўраду, прызначыўшы яго кіраўніком Службы знешняй выведкі. Паводле звестак журналістаў, гэта адбылося пасля таго, як Пуцін даведаўся пра таемнае абмеркаванне Фрадковым, мэрам Масквы Юрыем Лужковым, генпракурорам Уладзімірам Усцінавым і намеснікам кіраўніка адміністрацыі прэзідэнта Ігарам Сечыным магчымасці прыходу да ўлады. Усцінава пасля гэтага таксама перавялі на іншую пасаду, прызначыўшы міністрам юстыцыі РФ.

Апошнім прадухіленнем "змовы" выданне называе вяртанне Пуціна на пасаду прэзідэнта ў 2012 годзе. З 2008 года пасаду кіраўніка дзяржавы займаў Дзмітрый Мядзведзеў. У нейкі момант ён, як адзначаюць журналісты, "стаў прымаць самастойныя пастановы", якія не падабаліся Пуціну. У канцы лета 2011 года Пуцін заявіў Мядзведзеву, што вяртаецца на прэзідэнцкую пасаду, але паабяцаў праз шэсць гадоў зноў памяняцца месцамі. Гэтага, аднак, не адбылося.