Урад Польшчы створыць Цэнтр па барацьбе з дэзінфармацыяй

Першы ў Еўропе.

У Польшчы будзе створаны Цэнтр па барацьбе з дэзінфармацыяй. Пра гэта 30 верасня, выступаючы падчас VIII Форуму кібербяспекі ў Варшаве, паведаміў Кшыштаф Гаўкоўскі, міністр лічбавізацыі Польшчы і ўпаўнаважаны ўрада па пытаннях кібербяспекі, перадае «Польскае радыё».

Урадавы Цэнтр па барацьбе з дэзінфармацыяй павінен стаць адзіным дзяржаўным органам, які займаецца супрацьдзеяннем інфармацыйным пагрозам. Новую структуру ўзначаліць намеснік міністра лічбавізацыі Польшчы Павел Ольшэўскі. Адпаведнае распараджэнне падпісаў прэм’ер-міністр Дональд Туск.

Новая структура павінна аказваць дзяржаве аператыўную падтрымку і распрацоўваць механізмы супрацьдзеяння дэзінфармацыі, — заявіў міністр лічбавізацыі Кшыштаф Гаўкоўскі.

«У Польшчы — першай у Еўропе — мы створым адзіны цэнтр па барацьбе з дэзінфармацыяй, паказваючы тым самым, што мы не толькі гаворым пра дэзінфармацыю і змагаемся з ёй на заканадаўчым узроўні або праз кіраванне фінансавай падтрымкай, але і вядзём барацьбу з ёй на аператыўным узроўні», — адзначыў міністр лічбавізацыі.

На пачатак плануецца падрыхтаваць дакумент, у якім будуць акрэсленыя крыніцы пагроз і меры, што прымае Польшча для супрацьдзеяння дэзінфармацыі.

Намеснік міністра лічбавізацыі Польшчы Павел Ольшэўскі заявіў, што мае намер публічна называць людзей і групы, якія, паводле яго ацэнкі, распаўсюджваюць у Польшчы расійскія наратывы, што пагражаюць бяспецы краіны.

Ольшэўскі таксама паведаміў пра падрыхтаваны праект стратэгіі барацьбы з дэзінфармацыяй, які плануецца абмеркаваць, у прыватнасці, з грамадскімі арганізацыямі. Паводле яго слоў, адным з галоўных прынцыпаў дакумента з’яўляецца абарона грамадзянскіх свабод. Пры гэтым ён падкрэсліў, што свабода слова, на яго думку, не азначае свабоды для мовы варожасці і распаўсюджвання расійскай прапаганды.

Цэнтр будзе рыхтаваць і публікаваць паведамленні пра выяўленыя дэзінфармацыйныя кампаніі. Плануецца таксама запусціць спецыяльны сайт, на якім спецыялісты будуць разглядаць найбольш распаўсюджаныя інфармацыйныя наратывы.

Акрамя таго, Цэнтр павінен рыхтаваць аналітычныя матэрыялы і рэкамендацыі для органаў дзяржаўнай адміністрацыі па папярэджанні і супрацьдзеянні дэзінфармацыі.

Кшыштаф Гаўкоўскі, у сваю чаргу, заявіў, што Польшча сёння ўваходзіць у пяцёрку найбольш высока ацэненых стратэгічных партнёраў у сферы кібербяспекі ў свеце. Ён таксама адзначыў цеснае супрацоўніцтва з Злучанымі Штатамі і заявіў, што Польшча стварыла кадравую і экспертную базу, досвед якой выкарыстоўваюць іншыя дзяржавы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com