11 беларускіх каратыстаў затрымалі ў Польшчы падчас чэмпіянату свету
- 19.10.2026, 16:39
- 2,408
Ім далі восем дзён на выезд.
У польскім горадзе Бельска-Бяла затрымалі 11 беларусаў і чатырох расіян, якія, меркавана, збіраліся ўдзельнічаць у чэмпіянаце свету па каратэ.
Паводле даных польскіх памежнікаў, спартсмены ўехалі ў краіну па турысцкіх візах, што не адпавядала заяўленай мэце іх знаходжання. Цяпер яны павінны пакінуць Польшчу на працягу васьмі дзён, піша Most.
Чэмпіянат свету па каратэ сярод кадэтаў, юніёраў і моладзі да 21 года праходзіў у Бельска-Бяле з 14 па 18 кастрычніка.
Як распавёў прэзідэнт Польскага саюза каратэ Павел Полтаржэцкі, арганізатары загадзя атрымлівалі інфармацыю пра тое, што спартсмены з Беларусі і Расіі паспрабуюць патрапіць на спаборніцтвы, нягледзячы на абмежаванні Сусветнай федэрацыі каратэ і Міністэрства спорту. Мяркавалася, што яны разлічваюць на ўключэнне ў спіс удзельнікаў ужо пасля прыезду ў Польшчу. Словы Полтаржэцкага цытуе Beskidzka24.
Першым сігналам стала з'яўленне расіяніна на курсах для суддзяў. Тады адбылося першае затрыманне. Пазней арганізатары звярнуліся да польскіх памежнікаў з просьбай праверыць спартсменаў.
Як паведаміў прэс-сакратар Сілезскага аддзялення Памежнай службы Польшчы Шымон Мосціцкі, праверку правялі ў выхадныя, 17 і 18 кастрычніка. Памежнікі ўстанавілі, што 11 грамадзян Беларусі і чацвёра расіян уехалі ў краіну па турысцкіх візах, якія не адпавядалі заяўленай мэце знаходжання.
Усіх 15 спартсменаў затрымалі. Пасля праверкі начальнік памежнага падраздзялення ў Бельска-Бяле выдаў ім рашэнні, што абавязваюць пакінуць Польшчу на працягу васьмі дзён. Паводле слоў Мосціцкага, гэта мінімальна магчымы тэрмін.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас charter97@gmail.com
