18 лiстапада 2026, Серада, 15:44
Падтрымайце
сайт
Сім сім,
Хартыя 97!
Рубрыкі

ЗСУ паразілі мост праз Сіверскі Данец і тры ваенныя самалёты РФ

1
ЗСУ паразілі мост праз Сіверскі Данец і тры ваенныя самалёты РФ
Фота: украінскі вайсковец з беспілотнікам «Аіст» (Getty Images)

Адзін з іх, Іл-76, атрымаў вельмі значныя пашкоджанні.

Украінскія вайскоўцы паразілі мост праз Сіверскі Данец у Луганскай вобласці і пашкодзілі тры самалёты РФ. Адзін з іх, Іл-76, атрымаў вельмі значныя пашкоджанні.

Пра гэта паведамляе Генеральны штаб ЗСУ.

Паводле даных Генштаба, адной з мэт атакі 17-га і ў ноч на 18 лістапада стаў аўтамабільны мост праз Сіверскі Данец у раёне Станіцы Луганскай. Гэтай пераправай расійскія войскі карысталіся для забеспячэння фронту боепрыпасамі, палівам і тэхнікай.

«Пасля Керчанскага моста расіянам даводзіцца прывыкаць, што масты ў іх цяпер ламаюцца часцей, чым іх паспяваюць рамантаваць», — адзначылі вайскоўцы.

Акрамя таго, у тую ж ноч украінскія вайскоўцы паразілі рамонтную базу падраздзялення праціўніка паблізу Хамутаўкі ў Курскай вобласці. На гэтым аб’екце аднаўлялі пашкоджаную расійскую тэхніку, каб пасля вярнуць яе да баявых дзеянняў.

ЗСУ паразілі тры самалёты РФ

Генеральны штаб таксама паведаміў пра вынікі ўдару па 123-м авіярамонтным заводзе ў горадзе Старая Руса Наўгародскай вобласці. Атаку нанеслі 10 лістапада, і цяпер пацверджана пашкоджанне трох ваенна-транспартных самалётаў.

Адзін з іх — Іл-76 — атрымаў вельмі значныя пашкоджанні. Усе тры самалёты часова выведзеныя з ладу.

Ваенна-транспартная авіяцыя патрэбная расійскай арміі для перакідкі асабовага складу, тэхнікі і боепрыпасаў. Таму пашкоджанне самалётаў абмяжоўвае магчымасць праціўніка выкарыстоўваць іх для гэтых задач.

Удары Украіны па Крымскім мосце

Нагадаем, Украіна сістэмна атакуе аб’екты, якія Расія выкарыстоўвае для ваеннай лагістыкі. Адной з ключавых мэтаў стаў Крымскі мост — пераправа, якую акупанты выкарыстоўвалі для перакідкі на паўвостраў і далей на поўдзень Украіны паліва, боепрыпасаў, тэхнікі і асабовага складу.

Апошняя аперацыя супраць моста доўжылася два дні запар. У ноч на 16 лістапада ўкраінскія дроны пашкодзілі дарожнае пакрыццё як мінімум у двух месцах, а 227-метровая арка аўтамабільнай часткі была прыкметна дэфармаваная.

Аднак ужо наступнай ноччу Сілы абароны нанеслі паўторны камбінаваны ўдар дронамі і ракетамі. На гэты раз арка і пралёт аўтамабільнай часткі абрынуліся ў ваду, а чыгуначная канструкцыя таксама атрымала пашкоджанні.

Прэзідэнт Украіны Уладзімір Зяленскі пацвердзіў, што ўдар стаў завяршальным этапам сумеснай аперацыі СБУ і Генштаба, якую рыхтавалі некалькі тыдняў. Паводле яго слоў, перад атакай украінскія вайскоўцы паслядоўна аслаблялі расійскую супрацьпаветраную абарону, радары і сродкі РЭБ вакол пераправы.

Напісаць каментар 1

Таксама сачыце за акаўнтамі Charter97.org у сацыяльных сетках

▲