Візіт «васала»: Сі Цзіньпін вырашыў прынізіць Пуціна
- 18.11.2026, 14:33
Кіраўнік Кітая асабіста сустрэў Трампа ля самалёта, а да Пуціна накіраваў сакратара партыі.
Прэзідэнт Расіі Уладзімір Пуцін, які прыляцеў на саміт АТЭС у Кітай, не ўдастоіўся асабістага прыёму з боку старшыні КНР Сі Цзіньпіна у аэрапорце Шэньчжэня, піша The Moscow Times.
У сераду, 18 лістапада, Сі асабіста сустрэў ля трапа Дональда Трампа, які прыляцеў амаль на суткі пазней за Пуціна. Згодна з кадрамі, апублікаванымі кітайскім ТБ, Трамп і Сі абняліся, пасля чаго праслухалі гімны і разам па дывановай дарожцы пайшлі да ганаровага аўтакартэжу.
Пуціна, які задумаў візіт на саміт АТЭС як «Ялту 2.0», дзе вядучыя дзяржавы падзяляць свет на сферы ўплыву, напярэдадні сустрэў Цай Цы — член Пастаяннага камітэта Палітбюро ЦК Кампартыі Кітая, былы мэр Пекіна, які ў цяперашняй кітайскай іерархіі займае пятае месца сярод вышэйшых чыноўнікаў. У маі, калі Пуцін здзяйсняў дзяржаўны візіт у Кітай, яго сустракаў кіраўнік кітайскага МЗС Ван І.
Крэмль разглядае візіт Пуціна на саміт АТЭС як сімвалічны, а яго галоўная мэта — паказаць, што Расія ўваходзіць у «тройку» вядучых сусветных дзяржаў, — распавядаў Bloomberg крыніца, набліжаная да расійскага кіраўніцтва. Якія-небудзь пагадненні па выніках трохбаковых перамоваў Пуціна, Трампа і Сі малаімаверныя, сказаў суразмоўца агенцтва.
Двухбаковыя перамовы Пуціна з Сі адбыліся 18 лістапада. Як паведаміла прэс-служба Крэмля, расійскі прэзідэнт хваліў Кітай за «квітненне», называў Шэньчжэнь «узорам для пераймання» і заяўляў, што «вельмі рады» быць на саміце «сярод сяброў».
Пасля разрыву з Захадам уплыў Пекіна на Маскву дасягнуў такіх маштабаў, што Расія дэ-факта стала «васалам Кітая», адзначала раней Эліна Рыбакова, эканамістка Інстытута міжнароднай эканомікі Пітэрсана ў Вашынгтоне.
Значэнне КНР для расійскага гандлю цяпер непрапарцыйна вялікае, таму Пекін мае велізарны ўплыў на Маскву, казала Рыбакова: «Кітай з’яўляецца найбуйнейшым гандлёвым партнёрам Расіі, тады як на РФ прыходзіцца толькі нязначная доля кітайскага экспарту».
Паводле даных Інстытута Гайдара, летась Кітай набыў 27% усіх тавараў, якія Расія вывезла на знешнія рынкі, і забяспечыў 36% паставак імпарту ў РФ. Аднак доля расійскага рынку ў кітайскім экспарце скарацілася з 3,2% да 2,7% — узроўню Мексікі, што больш чым у пяць разоў ніжэй, чым у ЗША.