Супраць армянскага сябра Лукашэнкі ўзбудзілі крымінальную справу

Па падазрэнні ва ўхіленні ад выплаты падаткаў у асабліва буйным памеры.

У дачыненні да армянскага бізнэсмена і палітыка Гагіка Царукяна, лідара партыі «Працвітаючая Арменія» і сябра Аляксандра Лукашэнкі, узбуджана крымінальная справа па падазрэнні ва ўхіленні ад выплаты падаткаў у асабліва буйным памеры, паведамляе Армянская служба «Радыё Свабода».

Падрабязнасцяў абвінавачання следства пакуль не раскрывае. У якасці меры стрымання Царукяну забаранілі пакідаць краіну.

Пры гэтым адвакат палітыка Эміль Хачатрян заявіў, што лічыць пераслед незаконным і неабгрунтаваным. Паводле ягоных слоў, Царукян не мае дачынення да кіравання кампаніямі, праз якія, паводле версіі следства, маглі быць здзейсненыя падатковыя парушэнні.

Акрамя таго, адвакат абверг паведамленні пра тое, што палітыка нібыта не выпусцілі з краіны. Паводле ягоных слоў, Царукян разам з жонкай планаваў кароткую паездку ў ААЭ па асабістых справах, аднак сам адмовіўся ад вылету пасля таго, як у аэрапорце пачаліся дадатковыя праверкі дакументаў.

На парламенцкіх выбарах, што адбыліся 7 чэрвеня, ягоная партыя «Працвітаючая Арменія» не прайшла ў парламент, бо не здолела пераадолець бар’ер у 4% галасоў.

Заўважым, што пасля перамогі на выбарах прэм’ер Арменіі Нікол Пашынян назваў апазіцыйныя сілы краіны маргінальнымі і паабяцаў дабіцца іх «палітычнага знішчэння» на працягу бліжэйшых пяці гадоў. Паводле ягоных слоў, лідары апазіцыі, уключна з Робертам Качарянам, Гагікам Царукянам і Самвелам Карапетянам, павінны быць прыцягнутыя да крымінальнай адказнасці і апынуцца ў турме.

72-гадовы Гагік Царукян — адзін з самых багатых людзей у Арменіі. Ён і Аляксандр Лукашэнка падтрымліваюць цесныя сувязі — Царукян называе яго «сваім сябрам». Пасольства Беларусі ў Арменіі знаходзіцца побач з асабняком Царукяна ў вёсцы Арындж на ўскраіне Ерэвана. У студзені 2024 года ў госці да Царукяна як да кіраўніка Алімпійскага камітэта Арменіі прыязджаў Віктар Лукашэнка.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com