Перавозчыкі какаіну ў Расію аказаліся звязаныя з акружэннем Пуціна

Груз ішоў у Пецярбург.

Выданне «Сістэма» выявіла сувязі буйнога перавозчыка бананаў, на рэйсах якога неаднаразова знаходзілі какаін, з акружэннем прэзідэнта РФ Уладзіміра Пуціна. Высветлілася, што тры аперацыі спецслужбаў па барацьбе з наркотыкамі, якія праходзілі ў 2022-м, 2025-м і 2026 гадах, былі звязаныя з адной групай кампаній, а груз ішоў у Пецярбург, які лічыцца адным з найбуйнейшых вузлоў перавалкі какаіну з Лацінскай Амерыкі, піша The Moscow Times.

У жніўні 2025 года ў марскім порце Пецярбурга на кантэйнеравозе Cool Emerald, які прыбыў з Эквадора з партыяй бананаў, расійскія сілавікі канфіскавалі больш за 1,5 тоны какаіну коштам звыш 20 млрд рублёў. У 2026 годзе эстонскія сілавікі затрымалі кантэйнеравоз Baltic Spirit, які следаваў тым жа маршрутам у Санкт-Пецярбург, па падазрэнні ў перавозцы наркотыкаў. У 2022 годзе ў межах аперацыі «Эквадорскі вецер» расійскія сілавікі ў кантэйнеры кампаніі «Балтык Шыпінг» выявілі 50 кг какаіну.

Усе тры выпадкі былі звязаныя з кампаніяй Cool Carriers — буйным аператарам перавозак бананаў з Лацінскай Амерыкі. Паводле дадзеных «Сістэмы», на гэтым напрамку сфармаваны ўстойлівы лагістычны калідор Эквадор — Пецярбург, у кантэйнерах якога рэгулярна выяўляюць наркотыкі. Cool Carriers спецыялізуецца на перавозцы фруктаў з Эквадора, што робіць кампанію «ўскоснай ахвярай наркагандлю», пісала профільнае выданне Banana Export. Гандаль наркотыкамі — праблема прамысловага маштабу, заяўляў у канцы 2025 года выканаўчы дырэктар Cool Carriers Глен Селінг. Селінг пераклаў адказнасць на партнёраў, портавыя ўлады і мытнікаў. З свайго боку Cool Carriers «робіць усё, што можа [каб перашкодзіць кантрабандзе]», сцвярджаў Селінг.

У Расіі перавалка фруктаў гэтай кампаніі адбываецца праз «МГС-Тэрмінал» у порце Пецярбурга. Два з трох месцаў у савеце дырэктараў «МГС-Тэрмінала» на канец 2025 года займалі пачэсны консул РФ у ПАР Уладзімір Барысенка і Міхаіл Ганюшын, якія з’яўляюцца саўладальнікамі тэрмінала — ім належыць траціна кампаніі. Гендырэктар «МГС-Тэрмінала» Уладзімір Бурлеў заяўляў, што праз яго праходзіць амаль увесь бананавы імпарт у Расію. Асноўны кліент — «Балтык Шыпінг», на долю якой прыпадае каля дзвюх трацін паставак. «Балтык Шыпінг» таксама адносяць да Ганюшына і Барысенкі. Ганюшын працуе ў марской лагістыцы з 1990-х гадоў. У 2026 годзе яго кампанія спроставала публікацыі ўкраінскіх СМІ, у якіх сцвярджалася, што ён звязаны з акружэннем бізнесмена Аркадзя Ратэнберга.

Барысенка быў адным з заснавальнікаў асацыяцыі ўласнікаў катэджнага пасёлка Happy Järvi пад Пецярбургам. Сярод заснавальнікаў быў таксама Алег Рудноў — пецярбургскі медыямагнат, якога лічаць блізкім да Юрыя Кавальчука. Барысенка таксама з’яўляецца ўдзельнікам «Расійскай лігі пачэсных консульскіх службовых асоб». У клуб уваходзяць і іншыя фігуры, блізкія да Пуціна, уключаючы памочніка прэзідэнта Сяргея Фурсенку (консула Бангладэш), а таксама саўзаснавальніка лігі, пачэснага консула Сейшэльскіх астравоў Віктара Хмарына — аднакурсніка Уладзіміра Пуціна.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com