Найбуйнейшыя сталеліцейныя кампаніі Расіі паведамілі пра абвал прыбыткаў

Галіну накрыў беспрэцэдэнтны крызіс.

Стагнацыя эканомікі, заходнія санкцыі і высокія працэнтныя стаўкі па крэдытах зацягнулі расійскую металургію — адну з ключавых галін прамысловасці, на якую прыпадае 15% усяго выпуску ў краіне, — у наймацнейшы за некалькі дзесяцігоддзяў крызіс, перадае The Moscow Times.

Найбуйнейшы ў Расіі вытворца сталі — Новаліпецкі металургічны камбінат — па выніках першага паўгоддзя страціў 12% выручкі (388 млрд рублёў) і больш за палову чыстага прыбытку: ён склаў 21 млрд рублёў супраць 45,6 млрд рублёў годам раней, вынікае з яго справаздачнасці па МСФС.

«Северсталь», якая валодае Чарапавецкім металургічным камбінатам, трыма ГЗКамі, а таксама трубнымі заводамі, паведаміла пра падзенне прыбытку ў 9 разоў — да 4,12 млрд рублёў. Выручка кампаніі знізілася на 14%, паказчык EBITDA — удвая.

Магнітагорскі металургічны камбінат і ўвогуле стаў стратным: згодна са справаздачнасцю па МСФС ён страціў 19,1 млрд рублёў за паўгоддзе пры скарачэнні выручкі на 10%.

У расійскай сталеліцейнай галіне — «беспрэцэдэнтны крызіс», — пішуць аналітыкі «СберИнвестиций»: «Такой сітуацыі яшчэ не было — як па працягласці, так і па глыбіні падзення». Унутраны попыт на сталь падае з-за запаволення эканомікі, а экспарт, які раней выручваў металургаў, церпіць з-за санкцый, моцнага рубля і дарагой лагістыкі, піша «Сбербанк CIB».

У выніку найбунейшыя кампаніі галіны сутыкаюцца з касавымі разрывамі: «Северсталь» атрымала за паўгоддзе 70,2 млрд рублёў адмоўнага грашовага патоку, НЛМК — 11 млрд рублёў. Настолькі паступленні на рахункі аказаліся меншымі за адток. У 2026 годзе прыбытак сталеліцейных прадпрыемстваў «можа абнавіць мінімумы апошніх дзесяцігоддзяў», адзначаюць аналітыкі «Сбера».

«На рынак металу аказваюць ціск два ключавыя фактары. Па-першае, скарачэнне попыту ўнутры краіны ў металаёмістых галінах — будаўніцтве, машынабудаванні, нафтагазавым сектары, суднабудаванні, вытворчасці сельскагаспадарчай тэхнікі і чыгуначных вагонаў. Па-другое, закрыццё большасці экспартных рынкаў», — скардзіўся ў інтэрв'ю РБК старшы віцэ-прэзідэнт Прамыслова-металургічнага холдынгу (ПМХ) Аляксей Паршукоў.

Не маючы магчымасці прадаць метал, металургі скарацілі выплаўку сталі летась да мінімуму за 15 гадоў. У студзені–маі бягучага года вытворчасць упала яшчэ на 8,4%, да 26,6 млн тон, паводле звестак «Карпарацыі Чэрмет».

«Падзенне ўнутранага попыту на сталь, які скарачаецца нават хутчэй, чым вытворчасць, выклікана некалькімі ключавымі фактарамі: высокай ключавой стаўкай Банка Расіі, зніжэннем даступнасці рынкавага крэдытавання ў будаўніцтве і машынабудаванні, а таксама зрушэннем у часе многіх інфраструктурных праектаў», — адзначае аналітык «Цифра брокер» Іван Ефанаў.

Памагчы сталяварам магло б мірнае ўрэгуляванне ўкраінскага канфлікту, лічыць аналітык «Фінама» Аляксей Калачоў: «Патрэба ў аднаўленні тэрыторый і інфраструктуры стварыла б тады вялікі дадатковы попыт на металапрадукцыю. Аднак гэты патэнцыйны драйвер усё больш адсоўваецца на пазнейшы час».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com