Лукашэнка задумаў дзіўны рамонт «Нафтана»

Спалохаўся дронаў ЗСУ?

Штосьці новаполацкі завод «Нафтан» падазрона часта ладзіць прафілактычныя рамонты. Пішуць, што ў верасні ён стане на планавы рамонт. Ты, вядома, можаш мне сказаць: «А што тут такога? Калі хоча, тады і рамантуе».

І я не спрачаюся. Кожны суверэнны гарант, хай сабе нават і на апошнім подыху, рамантуе свае заводы, калі яму трэба. А калі не трэба, дык і не рамантуе. Бо калі НПЗ прафілактычна не рамантаваць, яны хутка пачынаюць псавацца. І тады замест планавых давядзецца рабіць пазапланавыя рамонты. Прычым нават без умяшання ЗСУ.

Вось у новаполацкага «Нафтана» такая тэхналагічная спецыфіка, што яго трэба прафілактычна рамантаваць раз на тры гады. І ў мяне не было б да гэтага рамонту ніякіх пытанняў, каб «Нафтан» свой папярэдні прафілактычны рамонт не праводзіў роўна год таму.

Я маю на ўвазе: шырока жыве завод «Нафтан»! Штогод у завода «Нафтан» планавыя рамонты. А вось дарагі саюзнік сваім заводам увогуле ніякіх планавых рамонтаў дазволіць не можа. У яго цяпер усе рамонты пазапланавыя.

Бо саюзнік якраз цяпер перажывае «другі этап напружанай сітуацыі на рынку паліва», якая ўзнікла пасля падзення на заводы абломкаў, з-за якіх там пачынаўся працэс хуткага акіслення вуглевадародаў, які суправаджаўся выкідам цеплавой энергіі.

Дык, як я падазраю, ні кропля бензіну з завода «Нафтан» у гэтай «напружанай сітуацыі» не была б лішняй на расійскім рынку паліва. І салярка з завода «Нафтан» гэтаму рынку таксама вельмі б спатрэбілася. Усё танней, чым гнаць бензін з Індыі, а потым не ведаць, куды яго дзець.

І яшчэ літаральна пару тыдняў таму камусьці дзеля дарагога саюзніка было зусім не шкада ніякага бензіну. Хтосьці на гэтым бензіне так рубіў капусту, што толькі хруст вакол стаяў.

А цяпер — усё. Бо калі завод «Нафтан» на месяц стане на планавы рамонт, у працоўным стане застанецца толькі Мазырскі завод. То бок дзяліцца з саюзнікам асабліва і не будзе чым. У сэнсе: «Вадзім Вадзімавіч, вы ж ведаеце, як я вас паважаю! Вы такі чалавек! Я б вам адліў бензіну ад усёй душы. Але рамонт, разумееш. Што я магу зрабіць?».

І я хачу сказаць, што гэта вельмі правільнае рашэнне. Бо ж завод добры. Лепш паставіць адзін завод на планавы рамонт, чым дачакацца, пакуль ЗСУ забяспечаць пазапланавыя рамонты адразу на абодвух.

Прычым гэта ж не ўпершыню, калі нехта прымае адзіна правільнае рашэнне. Вось, калі памятаеш, два месяцы таму нехта адключыў рэтранслятары на ўкраінскай мяжы, варта было прэзідэнту Зяленскаму ветліва пра гэта папрасіць. І адключыў, не дачакаўшыся тэрміну заканчэння ўльтыматуму прэзідэнта Зяленскага. А цяпер нехта вырашыў адключыць завод, нават не дачакаўшыся самога ўльтыматуму.

«І што вы мне цяпер можаце зрабіць? Не трэба мяне палохаць вашымі ўльтыматумамі. Я не баюся ніякіх ультыматумаў. Я сам усё выключу».

Бо пацан. Моцны, упэўнены ў сабе лідар, які цалкам кантралюе сітуацыю. А моцны, упэўнены ў сабе лідар — гэта такі лідар, які можа адключыць што заўгодна. І цяпер яго нават не трэба пра гэта спецыяльна прасіць. Бо птушачак страшна.

Тэлеграм-канал «Письма к дочери»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com