Дэсант робатаў, «троянскія» БТР і паніка ў расійскіх тылах

Як ідзе аперацыя «Вівальдзі» — найбуйнейшае наступленне ЗСУ з 2022 года.

Трэці армейскі корпус ЗСУ (былы полк «Азоў») публікуе падрабязнасці наступу на Ліманскім напрамку. Паводле звестак OSINT-аналітыка Клемана Молена, украінскім вайскоўцам ужо ўдалося вызваліць удвая больш тэрыторыі, чым падчас няўдалага наступу 2023 года, піша «Можем объяснить».

Аперацыя «Вівальдзі» пачалася ў маі. Улетку ЗСУ зрэзалі т.зв. «Шандрыгалоўскі выступ» і знялі пагрозу акружэння Славянска з поўначы. Зараз аперацыя працягваецца — ЗСУ спрабуюць выціснуць ЗС РФ за раку Жарабец, пішуць Z-каналы. Сітуацыю ў гэтым раёне называюць «надзвычай складанай» для расіян. Пры гэтым з карты «Рыбара» на 28 верасня і пастоў іншых Z-аўтараў вынікае, што ЗСУ ўжо форсавалі Жарабец і вядуць баі на ўсходнім беразе ракі.

Дэталі, якія публікуюцца цяпер, датычацца падзей летніх месяцаў. Аперацыя ідзе ў рэжыме цішы, таму ўся інфармацыя пра яе публікуецца з вялікай затрымкай. На карце ўкраінскага маніторынгавага праекта DeepState дагэтуль адлюстраваная частка Шандрыгалоўскага выступу, хоць у рэчаіснасці лінія фронту цяпер меркавана праходзіць у раёне ракі Жарабец.

Падчас наступу 3-і армейскі корпус выкарыстаў «троянскія БТР». Старыя савецкія бронетранспарцёры загрузілі выбухоўкай і аснасцілі сістэмай дыстанцыйнага кіравання, ператварыўшы іх у дроны-камікадзэ. Расійскія вайскоўцы падумалі, што да іх ідзе падмацаванне, — і не абстрэльвалі машыны, што набліжаліся. Магутныя выбухі знішчылі ўмацаваныя пазіцыі расіян.

Упершыню ў гісторыі наземныя робаты (НРК) былі закінутыя ў тыл праціўніка з дапамогай грузавых коптараў — на адлегласць да 10 км (фота справа). Ужо па зямлі яны пад’язджалі да пазіцый і тэхнікі ЗС РФ і падрываліся. Гэта выклікала «блытаніну і паніку» ў падраздзяленнях ЗС РФ, што адступалі, — піша Z-блогер.

Наступ падтрымлівала спецыяльная каманда па дэзінфармацыі праціўніка. «[Яна] збірае даныя з усіх падраздзяленняў корпуса, аналізуе іх і пралічвае, у што менавіта паверыць вораг. Іхняя праца — стварыць на полі бою карціну, што не адпавядае рэчаіснасці». Паводле слоў камандзіра 3 АК Андрэя Бялецкага, гэта ўдалося: «праціўнік быў перакананы, што асноўным напрамкам удару з’яўляецца Шандрыгаловае — Зялёная Даліна. Гэта прымусіла яго бессэнсоўна выдаткаваць свае рэзервы ў контратаках менавіта ў гэтым напрамку. Расіяне праспалі сапраўдны ўдар, які быў скіраваны на ўзяцце Новага».

Страты ЗС РФ за час аперацыі «Вівальдзі» ўкраінскі бок ацэньвае ў 5 тыс. чалавек. 250 расійскіх вайскоўцаў трапілі ў палон. Расійскі ваенкар Юрый Катэнак піша, што адной з прычын краху на Ліманскім напрамку сталі недакладныя данясенні: «банальна хлусілі з флагавтыкамі, заяўляючы пра вызваленне населеных пунктаў, якія насамрэч кантралюе праціўнік».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com