Шклозавод «Ялізава» так і не аднавіў працу

На найбуйнейшай у Беларусі Ялізаўскай гуце не працуюць два з трох цэхаў. Іхнія работнікі знаходзяцца ў вымушаных адпачынках.

Кіраўніцтва кажа, што прычынай спыненьня стаў тэрміновы рамонт абсталяваньня. Акрамя таго, зазначаюць у адміністрацыі, існуюць цяжкасьці з збытам прадукцыі, выкліканыя крызісам, перадае «Радыё Свабода».

Пра спыненьне двух цэхаў паведаміў адзін з работнікаў гуты. Паводле яго, прадпрыемства мае праблемы з набыцьцём сыравіны:

«Зараз набываць шклабой даводзіцца ў Беларусі, але ён брудны, і важдацца шмат трэба, і ненашмат ён таньнейшы за замежны. А за мяжой каб набываць, трэба адмысловы дазвол. Першы й другі цэхі людзям працягваюць адпачынкі. Было да дваццатага студзеня, але цяпер працягваюць далей. Чацьвёрты цэх думалі спыняць, але перадумалі», - кажа працаўнік.

Кіраўніцтва Ялізаўскай гуты пацьвярджае, што два цэхі спыненыя, аднак прычыны называе іншыя — рамонт абсталяваньня.

«У нас нестае камплектуючых для рамонту. Камплектавалыя ідуць яшчэ з Кітаю. Гэта дужа далёка. Мытныя пытаньні дужа дарагія. Кожнаму не патлумачыш, бо камэрцыйных тэхнічных пытаньняў яны ня ведаюць. Мы асноўную масу людзей адправілі ў адпачынкі. Не за свой кошт, як некаторыя прадпрыемствы, а ў адпачынкі, то бок выплачваем адпускныя, каб людзі не пакутавалі», — тлумачыць сытуацыю на прадпрыемстве прадстаўнік адміністрацыі.

Паводле яго, кіраўніцтва зьбіраецца спыняць і той цэх, які цяпер працуе, — таксама для рамонту абсталяваньня.

Прадстаўнік адміністрацыі пацьвярджае, што на прадпрыемстве ёсьць цяжкасьці з вырабам прадукцыі, выкліканыя крызісам. Што гэта за цяжкасьці, ён не патлумачыў.

«Усе праблемы, якія існуюць у сусьветнай эканоміцы і эканоміцы нашай краіны, яны, канечне ж, і на нас адбіваюцца», - зазначыў прадстаўнік адміністрацыі.

Сумеснае беларуска-аўстрыйскае акцыянэрнае таварыства «Шклозавод «Ялізава» вырабляе шырокі асартымэнт шкляной прадукцыі — слоікі, бутэлькі, упакоўку. Семдзесят пяць адсоткаў прадукцыі прадае ў постсавецкія краіны. На ім працуе каля тысячы чалавек — гэта жыхары пасёлку Ялізава, а таксама Асіповічаў і Бабруйску.