БХД звернецца ў пракуратуру па факце пераследу 700 партыйных актывістаў

Аргкамітэт па стварэнні партыі «Беларуская хрысціянская дэмакратыя» правядзе паўторны ўстаноўчы з'езд у канцы кастрычніка – пачатку лістапада гэтага года.

Пра гэта 28 ліпеня на прэс-канферэнцыі ў Менску паведаміў сустаршыня аргкамітэта партыі Аляксей Шэін, перадае БелаПАН.

Першы ўстаноўчы з'езд БХД прайшоў 28 лютага, аднак Міністэрства юстыцыі не зарэгістравала партыю, палічыўшы, што пры яго правядзенні былі дапушчаныя парушэнні. У Мінюсце таксама заявілі, што партыя не падала ўсе неабходныя для рэгістрацыі дакументы, у прыватнасці якія пацвярджаюць аплату дзяржпошліны за рэгістрацыю. 22 ліпеня рашэнне Мінюста падтрымаў Вярхоўны суд.

Сустаршыні аргкамітэта БХД лічаць адмову ў рэгістрацыі партыі палітычна матываванай.

«У нас ёсць звесткі з дзяржорганаў, што ўлады ў любым выпадку не маюць намеру рэгістраваць БХД, — сказаў Шэін. — Нягледзячы на гэта мы будзем упартымі ў імкненні прайсці афіцыйную рэгістрацыю».

Аляксей Шэін распавёў, што падчас падрыхтоўкі ўстаноўчага з'езду і разгляду пытання аб рэгістрацыі партыі ў Мінюсце пад пераслед патрапілі 500—700 актывістаў.

«Пераслед ішоў з боку супрацоўнікаў КДБ, органаў унутраных справаў, ідэалагічных працаўнікоў райвыканкамаў. Нашым актывістам пагражалі, прапаноўвалі адмовіцца ад свайго подпісу заснавальніка партыі», — сказаў Шэін.

Заснавальнікі БХД маюць намер патрабаваць ад пракуратуры прававой ацэнкі фактаў перашкаджэння ў ажыццяўленні дзейнасці па стварэнні палітычных партыяў.