У КДБ заяўляюць, што Банкаўскасу падоўжылі тэрмін затрымання на 10 сутак
2- 20.08.2010, 10:09
Ротны камандзір муніцыпальнай коннай паліцыі пры Віленскім галоўным камісарыяце Лайманас Банкаўскас змешчаны пад варту на тэрмін да 10 сутак.
Пра гэта паведаміў агенцтву «Інтэрфакс-Захад» у пятніцу начальнік цэнтра інфармацыі і грамадскіх сувязяў Камітэта дзяржаўнай бяспекі Беларусі Аляксандр Антановіч.
«Банкаўскас змешчаны пад варту на тэрмін да 10 сутак», - так пракаментаваў Антановіч паведамленні ў шэрагу СМІ пра падаўжэнне літоўскаму паліцыянту тэрміна ўтрымання пад вартай на два месяцы.
Пры гэтым прадстаўнік КДБ Беларусі адзначыў: «і беларускі, і літоўскі бакі зацікаўленыя, каб гэтая сітуацыя вырашылася ў найкарацейшыя тэрміны».
Ад іншых каментароў Антановіч адмовіўся, спаслаўшыся на таямніцу следства.
Як паведамляла агенцтва са спасылкай на Дзяржаўны памежны камітэт Беларусі, літоўскі паліцыянт, які ўязджаў у Беларусь як прыватная асоба, быў затрыманы 16 жніўня падчас правядзення аператыўна-вышуковых мерапрыемстваў смаргонскімі памежнікамі, сумесна з супрацоўнікамі КДБ і мытні ў пункце пропуску «Каменны Лог».
«Падчас догляду яго транспартнага сродку пад абіўкай пярэдняга пасажырскага сядзення быў выяўлены пакет памерам 8х3х2 см з наркатычным рэчывам. Экспертыза ўсталявала, што гэта метамфетамін вагой больш за 45 грамаў», - паведамілі ў ДПК.
«У дачыненні да затрыманага ўзбуджаная крымінальная справа па арт. 228 «Кантрабанда» Крымінальнага кодэкса Беларусі, удакладнілі ў ДПК.
Там паведамілі, што крымінальная справа для расследавання была перададзеная ў КДБ Беларусі.
Блізкія затрыманага выступілі з абвяржэннем абвінавачвання і заявілі, што калі і былі наркотыкі, дык іх падкінулі.
Амбасада Літвы ў Беларусі атрымала афіцыйную інфармацыю ўвечары ў аўторак.
