Мінюст пачаў «чыстку» адвакатаў
13- 28.06.2011, 12:03
Як паведамляе сайт Міністэрства юстыцыі, у Беларусі пачалася пазачарговая атэстацыя адвакатаў.
Галоўнымі ўпраўленнямі юстыцыі зацверджаны склады атэстацыйных камісій. У іх уключаныя кіраўнікі упраўленняў юстыцыі, калегій адвакатаў, суддзі, дэпутаты, прадстаўнікі юрыдычнай навукі.
Атэстацыйныя камісіі, узначаленыя начальнікамі адпаведных галоўных упраўленняў юстыцыі, разгледзяць працу адвакатаў зыходзячы з якасных і колькасных паказчыкаў іхняй дзейнасці па абароне па крымінальных справах, прадстаўніцтва па грамадзянскіх справах, справах, якія ўзнікаюць з гаспадарчых (эканамічных) спрэчак, і справах аб адміністрацыйных правапарушэннях.
Пры ацэнцы дзейнасці будуць улічвацца работа па прававой асвеце насельніцтва і ўдзел у аказанні юрыдычнай дапамогі жыхарам сельскай мясцовасці і аграгарадкоў. Пры атэстацыі будуць улічвацца заахвочванні адвакатаў, а таксама дысцыплінарныя спагнанні, факты парушэння дзеючага заканадаўства, паведамляе сайт Мінюста.
«Вынікі атэстацыі дазволяць даць рэальную адзнаку якасці і эфектыўнасці дзейнасці як кожнага адваката, так і адпаведнай раённай юрыдычнай кансультацыі і абласной (Менскай гарадской) калегіі адвакатаў у цэлым», - адзначаецца ў паведамленні.
Нагадаем, у лютым Мінюст пазбавіў ліцэнзій чатырох адвакатаў Менскай гарадской калегіі адвакатаў - Алега Агеева, Тацяну Агееву, Уладзіміра Тоўсціка і Тамару Гараеву, якія абаранялі фігурантаў справы аб так званых масавых беспарадках у Менску 19 снежня. 3 сакавіка са складу калегіі быў выключаны адвакат кандыдата ў прэзідэнты Андрэя Саннікава Павел Сапелка.
23 сакавіка Мінюст папярэдзіў прэзідыум Менскай гарадской калегіі адвакатаў аб магчымасці прымянення да «некаторых службовых асобаў» прэзідыума дысцыплінарнага і адміністрацыйнага характару ў выпадку «працягу палітыкі канфрантацыі» і «палітызаванасці пытанняў спынення дзеяння ліцэнзій» сябраў калегіі.
6 чэрвеня Павал Сапелка звярнуўся ў Канстытуцыйны суд Беларусі з просьбай даць адзнаку загаду Мінюста аб пазачарговай атэстацыі адвакатаў.
Былы адвакат сцвярджае, што загад Мінюста супярэчыць нарматыўным актам, які рэгулюе адвакацкую дзейнасць, у тым ліку палажэнням закона «Аб адвакатуры» і пастановы Мінюста «Аб зацвярджэнні Інструкцыі аб парадку правядзення атэстацыі адвакатаў». У іх нідзе наўпрост не гаворыцца пра пазачарговай атэстацыі адвакатаў.