Міхалка і Вольскага вылучылі на «Брэнд года»
31- 24.01.2013, 17:27
Журы нечакана пашырыла спіс намінантаў на «Брэнд-персону года».
Да гэтага на медаль і ганаровае званне прэтэндавалі толькі спартсмены і поп-выканаўцы.
Як перадае «Еўрарадыё», за дзень да абвяшчэння вынікаў штогадовага конкурсу «Брэнд года» прафесійнае журы нечакана пашырыла спіс намінантаў. Да вылучаных раней эстрадных артыстаў (Ларыса Грыбалёва, Анатоль Ярмоленка, Ядвіга Паплаўская і Аляксандр Ціхановіч) і знакамітых спартсменаў (Максім Мірны, Вікторыя Азаранка, Аляксандра Герасіменя) дадаліся пісьменнік Андрэй Жвалеўскі, лідэр гурта J:Морс Уладзімір Пугач, лідэр «Ляпіса Трубяцкога» Сяргей Міхалок і фронтмэн гурта «Крамбамбуля» Лявон Вольскі. Інфармацыю пра гэта ўскосна пацвердзілі Еўрарадыё некаторыя члены журы конкурсу.
«Брэнд-персона» - галоўная намінацыя конкурсу «Брэнд года». У спісе леташніх намінантаў на сайце конкурсу «брэнд-персоны» пералічаны першымі.
Імёны пераможцаў будуць апублікаваныя 25 студзеня падчас заключнай цэрымоніі конкурсу «Брэнд года 2012», якая пачнецца ў 17:00 у Нацыянальнай бібліятэцы.