Лукашэнка баіцца паўтарыць лёс Кадафі і Асада

Кіраўнік заявіў пра неабходнасць праверыць стан узброеных сіл Беларусі.

Пра гэта ён сказаў, падводзячы вынікі свайго наведвання 61-й знішчальнай авіябазы, перадае «Інтэрфакс».

«У бліжэйшы час мы вельмі сур'ёзна праверым на боегатоўнасць нашы Узброеныя сілы», - заявіў Лукашэнка.

Кіраўнік лічыць магчымым мадэрнізацыю і аднаўленне некаторых узораў узбраення і ваеннай тэхнікі, і заклікаў не спяшацца з вывадам са складу ВПС і войскаў СПА самалётаў Су-27. Пра гэта ён сказаў, нагадаўшы пра «арабскую вясну» - народныя паўстанні ў Егіпце, Тунісе, Лівіі і Сірыі.

«Дапусцім, ці трэба нам Су-27 - вельмі магутны і дарагі самалёт. У нас іх два дзесяткі. Я выказаўся за тое, што нам трэба падумаць і захаваць гэтыя самалёты на нейкі, дапусцім, пагражальны перыяд, як бы гэта дорага ні было», - заявіў ён.

«Гэта значыць, зыходзячы з вопыту войнаў на арабскай дузе, нам не трэба спяшацца выводзіць з сістэмы абароны нашай дзяржавы нейкія віды тэхнікі», - адзначыў кіраўнік.

Лукашэнка азнаёміўся з арганізацыяй баявога дзяжурства ў 61-й авіябазе, у прыватнасці, з гатоўнасцю дзяжурных экіпажаў да вылету.

«Я хацеў праверыць, ці паказуха гэта: падрыхтаваць дзяжурны самалёт да вылету. Шэсць з паловай хвілін - і самалёт ужо быў на ўзлёце. Малайцы», - сказаў ён, адзначыўшы, што адпаведны нарматыў ва Узброеных сілах Расеі «складае 18 хвілін, Украіны - 15, у Польшчы - дзесьці каля 15 хвілін».

Кіраўнік таксама распавёў пра свае ўражанні пасля паказу яму ўзораў ваеннай тэхнікі, якая стаіць на ўзбраенні, і яе перспектыўных узораў.

«Выстаўленая лінейка (тэхнікі і ўзбраенняў) - гэта для таго, каб вас уразіць і паказаць, што мы ў Беларусі нешта ўмеем рабіць. Умеем рабіць і мадэрнізаваць», - сказаў Лукашэнка. У прыватнасці, паводле яго слоў, замежныя дзяржавы сёння актыўна займаюцца мадэрнізацыяй і аднаўленнем ваеннай тэхнікі. «Напрыклад, танк Т-72 - добры танк, які будзе яшчэ выкарыстоўвацца. Навошта закупляць новую дарагую тэхніку, калі яе можна аднавіць і мадэрнізаваць? А мы ўсё гэта ўмеем рабіць», - заявіў ён.

«Што тычыцца сродкаў выведкі, сувязі, - гэта вытворчасць суперсучасных сістэм, якія мы таксама ўмеем рабіць. Гэта вочы і вушы ВПС і СПА», - адзначыў кіраўнік.

Лукашэнка звярнуў увагу на перспектыўныя распрацоўкі, у прыватнасці, беспілотныя лятальныя апараты. Кіраўнік растлумачыў, што яго паездка была запланаваная даўно. «Першы этап - гэта прапрацоўка, мадэрнізацыя і забеспячэнне Узброеных сіл», - адзначыў ён. Паводле яго слоў, міністр абароны далажыў сваё бачанне гэтых пытанняў. «Колькі павінна, зыходзячы з сучасных умоў, быць сістэм СПА, самалётаў, верталётаў, бронетэхнікі і гэтак далей», - сказаў Лукашэнка.

Паводле яго слоў, у Беларусі сёння налічваецца каля 250 ваенных гарадкоў. «Вызначаліся, колькі іх павінна быць, колькі мы павінны мець такіх баз, - адзначыў Лукашэнка. - Гэта значыць, сёння мы ў палявых умовах паспрабавалі кінуць позірк на нашу армію і якой яна павінна быць заўтра, і які кошт пытання».

На камандным пункце 61-й авіябазы пад Баранавічамі Лукашэнку праінфармавалі аб арганізацыі нясення баявога дзяжурства на знішчальнай авіябазе, асаблівасцях выканання задач дзяжурным разлікам. Намкамандуючага ВПС і войскамі СПА генерал-маёр Ігар Голуб далажыў аб авіяцыйнай тэхніцы, якая знаходзіцца на ўзбраенні, яе спраўнасці, пакінутым рэсурсе і парадку далейшай эксплуатацыі.

Пасля гэтага на рухомым камандным пункце Узброеных сіл Лукашэнка правёў нараду, на якой быў заслуханы даклад міністра абароны Юрыя Жадобіна аб стане ВПС і войскаў СПА, сістэмах баявога забеспячэння Узброеных сіл і перспектывах іх развіцця.