Новыя падаткі на Кіпры - удар па «сям'і» Лукашэнкі

Закон, які разглядае сёння парламент Кіпра, стане галаўным болем для беларускіх алігархаў.

Падатак на ўклады ў банках вострава, які можа быць адобраны сёння, ударыць па набліжаным да Лукашэнкі чыноўнікам і бізнесменам.

Расейскі палітолаг Андрэй Суздальцаў у інтэрв'ю charter97.org распавёў пра тое, якія наступствы для іх будзе мець новы закон.

«Кіпр, разам з Аўстрыяй, Кубай і некаторымі арабскімі краінамі, уваходзіць у лік дзяржаў, дзе захоўваюць свае грошы беларускія алігархі і «сям'я» дыктатара. Калі супаставіць факты, то можна выказаць здагадку, што сума, якая ляжыць на іх укладах у банках вострава, дасягае 800 мільёнаў даляраў. Гэта, у першую чаргу, грошы, атрыманыя ад махінацый з расейскай нафтай і энергарэсурсамі, а таксама адкаты ад калійнага бізнэсу», - заявіў эксперт.

Палітолаг упэўнены, што страты ад новага законапраекта для беларускіх алігархаў будуць значнымі. Разам з тым, ён лічыць, што такога грамадскага рэзанансу, як у Расеі, скандальны законапраект у нашай краіне не выкліча.

«У Беларусі як у сацыялістычнай дзяржаве існуюць ідэалагічныя штампы. Адзін з іх складаецца ў тым, што ў грамадстве няма сацыяльнага расслаення, усё нібыта роўныя. Улады кажуць, што ў краіне адсутнічае карупцыя. На самай справе, гэта не так. У Беларусі ёсць і вельмі багатыя людзі, і велізарная карупцыя. Але набліжаныя да кіраўніка алігархі хаваюць свае прыбыткі і не будуць гаварыць пра іх. Але галаўны боль ад гэтага новаўвядзення ў іх абавязкова з'явіцца», - заявіў Андрэй Суздальцаў.

Адзначым, што раней еўрапейскія СМІ неаднаразова звярталі ўвагу на непразрыстасць фінансавай сістэмы Кіпра. У адрас ўрада вострава гучала крытыка і ў сувязі з тым, што ў банках краіны захоўваюць свае капіталы чыноўнікі і бізнесмены з краін, у дачыненні да якіх дзейнічаюць санкцыі ЕЗ, - Беларусі, Ірана, Сірыі.

Брусэльскае выданне EUobserver таксама пісала пра тое, што Лукашэнка і яго блізкія сваякі выкарыстоўваюць зарэгістраваныя на Кіпры кампаніі для куплі нерухомасці ў Менску, а алігарх Уладзімір Пефціеў даўно вядзе свой бізнес на востраве.

«Еўрапейскі Звяз, як і любое іншае інтэграцыйнае аб'яднанне, зацікаўлены ў тым, каб усе яго часткі працавалі па адных правілах. Ніякіх выключэнняў, у тым ліку і для Кіпра, тут быць не можа», - сказаў Суздальцаў.

Нагадаем, у пятніцу еўрапейскія ўлады дамовіліся з кіпрскімі ўладамі аб тым, што дадуць Кіпру экстраную дапамогу ад ЕЗ і МВФ у памеры 10 мільярдаў еўра, але ў абмен на шэраг мер, сярод якіх павінна быць і ўвядзенне падатку на дэпазіты.

Абмеркаванне закона аб аднаразовым падатку на ўсе банкаўскія ўклады Кіпра павінна было адбыцца ў парламенце краіны ў панядзелак, аднак затым было перанесенае на вечар сённяшняга дня.