Мінэнерга Расеі абвінавачвае Беларусь у росце коштаў на бензін

Беларусь і біржавыя спекулянты аказалі ўплыў на рост аптовых коштаў на бензін у Расеі.

Прадпрыемства «Белнафтахім» спрабуе самастойна размяркоўваць расейскае паліва, якое было атрымана на беларускіх заводах, і пакідае яго ў сваёй краіне, замест таго каб вярнуць у Расею, піша РБК.

На пасяджэнні штаба па маніторынгу сітуацыі на нафтапрадуктовым рынку, якое прайшло на мінулым тыдні, намеснік кіраўніка Міністэрства энергетыкі Расеі Кірыл Маладцоў звярнуў увагу на спробы канцэрна «Белнафтахім» самастойна размяркоўваць рэсурсы расейскіх кампаній. У пратаколе ён паказвае, што больш за 40% бензіну, вырабленага з давальніцкай сыравіны «Татнафты» ў жніўні, засталося на тэрыторыі Беларусі.

Кірыл Маладцоў рэкамендуе «Татнафце» і іншым нафтавым кампаніям давальніцкае паліва пастаўляць у Расею, за выключэннем аб'ёмаў, якія неабходныя для забеспячэння ўласнай сеткі АЗС у Беларусі і Украіне. Ён таксама папрасіў «Белнафтахім» падаць у Мінэнерга дадзеныя пра план і факт паставак у Расею ў трэцім квартале бензіну, атрыманага з аб'ёмаў давальніцкай расейскай нафты. У «Белнафтахіме» ад каментароў адмовіліся.

З пачатку года з Беларусі было пастаўлена 646,4 тыс. т бензіну і дызпаліва (гл. табліцу). Па словах аналітыка ІФК «Салід» Артура Ахметава, па давальніцкай схеме працуюць, як правіла, тыя расейскія кампаніі, у якіх ёсць АЗС у Беларусі. Акрамя «Татнафты» гэта «Лукойл», «Газпрам нафта» і ТНК-BP (да аб'яднання з «Раснафтай»). «Давальніцкая схема мяркуе рээкспарт паліва ў Расею. Але строгага нагляду за выкананнем гэтага правіла няма», - кажа эксперт.

Раней Масква ўжо вінаваціла Менск у тым, што ён не выконвае абавязацельствы ў рамках існуючага нафтавага балансу. У ліпені аб'ём прадаваных беларусамі ў Расею нафтапрадуктаў знізіўся: беларусы прапаноўвалі сваё паліва па больш высокім кошце з арыентоўкай на Захад. Расейскіх спажыўцоў гэта не задаволіла.

Зніжэнне паставак беларускага бензіну, а таксама шэраг іншых фактараў (экспарт бензіну, рост акцызаў, рамонт на шэрагу заводаў) прывялі да таго, што і расейскія аптовыя кошты падскочылі на 20-30%. У цяперашні час ФАС праводзіць праверку з гэтай нагоды. Вінаватым у канфіскацыі тавараў з рынку нафтавым кампаніям пагражаюць шматмільярдныя штрафы.