19 чэрвеня 2019, Серада, 23:16
Мы ў адной лодцы
Рубрыкі

Дыктатар супраць інтэрнэту

91

Цяпер улады змогуць цалкам заблакаваць любы інтэрнэт-рэсурс.

«Дэпутаты» адразу ў двух чытаннях прынялі папраўкі ў закон «Аб сродках масавай інфармацыі».

Як адзначыла міністр інфармацыі Лілія Ананіч, «беларускую інфармацыйную прастору інтэгравалі ў сусветную». Пры гэтым, сказала яна, «кожнаму грамадзяніну гарантаваная свабода меркаванняў, перакананняў, а таксама свабода іх выказванняў».

У той жа час, падкрэсліла Лілія Ананіч, з улікам глабальных геапалітычных зменаў, эканамічных рэалій неабходна ўнесці папраўкі ў закон аб СМІ «ў мэтах найбольш поўнай рэалізацыі права на атрыманне дакладнай інфармацыі, забеспячэнне нацыянальнай бяспекі і абароны інтарэсаў дзяржавы», піша БелаПАН.

Ананіч адзначыла, што ў Беларусі цяпер больш за пяць мільёнаў карыстальнікаў інтэрнэтам. Пры гэтым, падкрэсліла яна, не заўсёды інфармацыя, з якой яны знаёмяцца, адпавядае інтарэсам грамадства і дзяржавы.

На думку міністра, інтэрнэт-рэсурсы, якія распаўсюджваюць інфармацыю, з'яўляюцца дэ-факта СМІ. У сувязі з гэтым папраўкі ў законапраект распаўсюджваюць дзеянне закона аб СМІ на інфармацыйныя рэсурсы і іх складовыя часткі. Выключэнне складае палажэнне аб неабходнасці дзяржаўнай рэгістрацыі.

На інтэрнэт-рэсурсы, у прыватнасці, будзе распаўсюджвацца забарона «на размяшчэнне інфармацыі, якая прапагандуе экстрэмісцкую дзейнасць, якая змяшчае заклікі да вайны, іншай інфармацыі, якая наносіць шкоду інтарэсам дзяржавы».

На патрабаванне дзяржаўнага органа інтэрнэт-рэсурс будзе абавязаны размясціць зняпраўджванне раней размешчанай інфармацыі і выдаліць яе. Пры гэтым пры адмове ў патрабаванні рэгулюючага органа можа быць прынятая пастанова ў тым ліку і пра блакаванне інтэрнэт-рэсурсу.

Таксама законапраект прадугледжвае забарону на валоданне больш за 20% акцый прадпрыемства, якое займаецца выдавецкай і рэдакцыйнай дзейнасцю, замежнай дзяржавай або грамадзянінам.

Ананіч адзначыла, што папраўкі ў закон аб СМІ дазволяць стварыць «эфектыўную інфармацыйную абарону ад дэструктыўнага ўплыву звонку».

Акрамя таго, законапраект прадугледжвае стварэнне дзяржаўнага рэестра распаўсюджвальнікаў інфармацыі. У выпадку вынясення двух і больш пісьмовых папярэджанняў прадугледжана магчымасць выключэння распаўсюднікаў інфармацыі з рэестра, што цягне забарону на занятак гэтай дзейнасцю.

Адзначым, што ў «палаце прадстаўнікоў» журналістам сёння не раздалі нават абгрунтаванне законапраекту. Тэкст законапраекта таксама адсутнічае на Нацыянальным прававым інтэрнэт-партале.