Першы запуск звышцяжкай ракеты Falcon Heavy: чаму гэта важна

SpaceX рыхтуецца да тэставага запуску самай магутнай ракеты ў свеце.

Прыватная касмічная кампанія SpaceX у аўторак 6 лютага рыхтуе першы запуск звышцяжкай ракеты Falcon Heavy, «самай магутнай ракеты ў свеце».

Калі пуск адбудзецца паспяхова, амерыканская фірма ўмацуе сваё лідарства ў касмічнай галіне дзякуючы самай грузапад'ёмнай ракеце, піша currenttime.tv.

У 2017 годзе SpaceX ужо абагнала найбліжэйшага канкурэнта, расейскі Раскосмас, па ліку паспяховых запускаў: 18 супраць 16. У выпадку поспеху Falcon Heavy кампанія зможа дастаўляць на арбіту новыя грузы танней за канкурэнтаў і выводзіць туды звышцяжкія спадарожнікі.

Пуск павінен адбыцца паміж 21.30 і 00.30 (паводле Менску). Сачыць за ім можна тут:

Ракета-носьбіт Falcon Heavy стартуе на арбіту паміж Зямлёй і Марсам вакол Сонца з пляцоўкі LC39А на мысе Канаверал, штат Фларыда, ЗША. Менавіта адсюль да Месяца запускалі ў 1969 годзе «Апалон-11».

На борце не будзе людзей: толькі аўтамабіль Tesla Roadster заснавальніка SpaceX, Ілона Маска. За стырном будзе сядзець манекен у пакуль афіцыйна не прэзентаваным скафандры кампаніі. У калонках будзе граць Space Oddity Дэвіда Боўі.

Вось як гэта будзе выглядаць, паводле версіі SpaceX:

«Я буду ўважаць за поспех, калі яна (ракета - заўв.) проста падымецца ўгору і не разнясе пускавую пляцоўку дашчэнту. Усё ж такі гэта эквівалент у 4 мільёнаў фунтаў дынаміту», - цытуе Маска АР.

Falcon Heavy зможа даставіць на нізкую калязямную арбіту да 64 тон грузу: амаль утрая больш, чым Пратон-М (23 тоны). Толькі ракета Saturn V, якая выкарыстоўвалася для палётаў на Месяц (апошні запуск - у 1973 годзе) пераўзыходзіла яе па магутнасці і грузападымальнасці. SpaceX плануе паўторна выкарыстоўваць прыступкі Falcon Heavy, што можа прыкметна зменшыць кошт пускаў.

Falcon Heavy ўпершыню анансавалі ў 2011 годзе.

У SpaceX кажуць, што гэтая цяжкая ракета задумвалася для дастаўкі людзей на Месяц і Марс. Яна выкарыстоўвае тры разгонныя блокі ад Falcon 9, асноўнай ракеты SpaceX, і ў суме налічвае 27 рухавікоў.

Два з трох разгонных блокаў ужо выкарыстоўваліся для запускаў у 2016 годзе. Кампанія разлічвае, што ўсе тры блокі прызямляцца асобна пасля сённяшняга старту для далейшага паўторнага выкарыстання.

SpaceX збіраецца адправіць людзей на Марс да 2024 года. Для гэтага будзе выкарыстоўвацца яшчэ больш цяжкая ракета BFR.