Юная берасцейка: Не будуйце завод пад Берасцем, дзецям тут яшчэ жыць

Штотыдзень берасцейцы ў знак пратэсту супраць будаўніцтва акумулятарнага завода выходзяць на плошчу.

«Я люблю свой горад. Я люблю прыроду. Я не хачу, каб будавалі акумулятарны завод пад Берасцем. Не будуйце яго, калі ласка - бо дзецям тут яшчэ жыць», - з такімі словамі падчас жывой трансляцыі «Брестской газеты» з плошчы Леніна 15 красавіка звярнулася дзяўчынка (на відэа гэты момант на 44 хв 40 сек - заўв.).

Удзень на галоўнай плошчы горада чарговым разам сабраліся праціўнікі акумулятарнага завода. Нядзельныя кармленні галубоў у знак пратэсту супраць з'яўлення гэтай вытворчасці пад Берасцем пачаліся 5 сакавіка і з таго часу паўтараюцца штотыдзень. Раней удзельнікі некалькі разоў прыносілі на плошчу чорныя шары з надпісам «Жыць» і спявалі аднайменную песню, аднак у апошні час яны наважылі адмовіцца ад гэтай ідэі, каб іх не абвінавацілі ва ўдзеле «ў несанкцыянаваным мерапрыемстве».

Удзень 15 красавіка колькасць людзей, якія выйшлі пакарміць галубоў, склала больш за 80 чалавек.

Напярэдадні прайшла прэс-канферэнцыя, падчас якой актывісты абвясцілі збор подпісаў пад зваротам да Лукашэнкі з просьбай адхіліць ад пасадаў кіраўніцтва горада Берасця, Берасцейскага раёна і Берасцейскай вобласці праз страту да іх даверу. Як распавялі актывісты, збор будзе весціся некалькі тыдняў. З іх слоў, яны не ставяць мэта некалькі дзясяткаў тысяч подпісаў, як гэта было са зборам подпісаў супраць акумулятарнага завода - гэтым разам будзе дастаткова блізу 6 тысяч подпісаў.

Ініцыятыўныя групы супраць будаўніцтва акумулятарнага завода пад Берасцем ужо які месяц дамагаюцца як мінімум прыпынення гэтай будоўлі. На іх думку, гэта вытворчасць з'яўляецца патэнцыйна небяспечнай для экалогіі і здароўя жыхароў і вядзецца са шматлікімі парушэннямі. Хвалюючыя людзей пытанні былі выкладзены ў звароце ў адміністрацыю Лукашэнкі, які быў перададзены разам з сабранымі подпісамі. Адказаць на іх даручана камісіі, якая была створаная на даручэнні прэм'ер-міністра, аднак актывісты сумняваюцца ў тым, што іх пачуюць.

У канцы студзеня ГА «Экадом» і некалькі прадстаўнікоў ініцыятыўнай групы звярнуліся ў суд Маскоўскага раёна Берасця з пазовам аб поўным прыпыненні гаспадарчай дзейнасці ТАА «Айпаўэр». У пазове яны заяўлялі, што, на іх думку, будаўніцтва завода вядзецца з парушэннямі і яго прыпыненне патрэбнае для аднаўлення законнасці. У канцы сакавіка суд у задавальненні пазову адмовіў.

Пачынаючы з сакавіка праціўнікі завода кожную нядзелю выходзілі на плошчу Леніна ў Берасці пакарміць галубоў, каб звярнуць увагу ўладаў і грамадскасці на сітуацыю вакол завода. Некаторых з іх за гэта прыцягнулі да адміністрацыйнай адказнасці, іншых выклікалі ў міліцыю для дачы тлумачэнняў і прафілактычнай гутаркі аб недапушчальнасці парушэння заканадаўства аб масавых мерапрыемствах.

Паралельна актывісты спрабуюць дабіцца ад мясцовых уладаў дазволу на правядзенне мітынгу супраць будаўніцтва завода, але пакуль ім гэта не ўдалося. Цяпер яны чакаюць адказу з гарвыканкаму на чарговую заяўку.