Нікол Пашынян заклікаў армян выйсці на вуліцы ў дзень выбараў прэм'ера

Лідар пратэстаў у Арменіі заклікаў усіх пратэстоўцаў сабрацца на цэнтральнай плошчы Ерэвана 1 траўня.

Лідар апазіцыі прапанаваў сваім прыхільнікам сабрацца ў дзень выбараў прэм'ера на плошчы Рэспублікі, паведамляе РБК.

«А як мы правядзем гэты дзень, будзе залежаць ад таго, якая палітычная атмасфера будзе ў гэты дзень», - падкрэсліў Пашынян.

Выступаючы на мітынгу, Пашынян заявіў, што ўсе апазіцыйныя фракцыі паабяцалі падтрымаць яго як народнага кандыдата ў якасці прэм'ера на галасаванні 1 траўня, а кіруючая рэспубліканская фракцыя - што не будзе перашкаджаць галасаванню.

«1 траўня ў нас ёсць магчымасць ператварыць нашу фактычную перамогу ў юрыдычную», - падкрэсліў апазіцыянер.

«Праз гэты наш рух міжнародны рэйтынг Арменіі падняўся да небывалых вышынь. Мы выйгралі без адзінай кроплі крыві», - сказаў Пашынян, дадаўшы, што пры гэтым нельга страчваць пачуццё рэальнасці і рух пратэсту павінны заставацца мірным.

Пакуль не вядома, ці падтрымае Пашыняна хто-небудзь з рэспубліканцаў. «Заўтра раніцай я павінен сустрэцца з прадстаўнікамі ўсіх парламенцкіх фракцый, каб вечарам вас паінфармаваць, што перамога вашага кандыдата на выбарах 1 траўня гарантаваная», - адзначыў ён.

Пашынян заклікаў жыхароў Ерэвана ў аўторак, а 17:00 (16 паводле Менску), зноў выйсці на марш па сталіцы, а 19:00 (18 паводле Менску) зноў запрасіў усіх на мітынг на плошчы Рэспублікі, дзе паабяцаў расказаць пра вынікі перамоваў з фракцыямі.

«Так, я гатовы ўзяць на сябе адказнасць і стаць прэм'ерам Арменіі, таму што я служу народу Арменіі, Нагорнага Карабаху і рэспубліцы», - завяршыў Пашынян сваю прамову.

Тры партыі парламента Арменіі - «Елк», «Квітнеючая Арменія» і «Дашнакцуцюн» - падтрымаюць кандыдатуру Пашыняна на выбарах прэм'ера. Гэта - 47 дэпутатаў, астатнія 58 месцаў у парламенце кантралюе кіруючая партыя. Для выбару прэм'ера неабходна 53 галасы.