У ААН назвалі краіны з самым высокім узроўнем чалавечага развіцця
6- 15.09.2018, 20:21
- 14,857
Краіны ацэньваліся паводле чатырох параметраў.
У ААН прадставілі даклад «Індэксы і індыкатары чалавечага развіцця», у якой названыя 189 краін з найбольш высокім узроўнем чалавечага развіцця.
Краіны ацэньваліся паводле чатырох параметраў: працягласць жыцця, меркаваная і сярэдняя працягласць навучання, а таксама аб'ём валавога нацыянальнага прадукту на душу насельніцтва.
Першае месца заняла Нарвегія - там працягласць жыцця складае крыху больш за 82 гады, меркаваная працягласць навучання - амаль 18 гадоў, сярэдняя - крыху больш за 12 гадоў, аб'ём валавога нацыянальнага прадукту на душу насельніцтва - больш за $68 тысяч.
Следам ідзе Швейцарыя, тройку замыкае Аўстралія. Чацвёртае месца - за Ірландыяй, пяцёрку замыкае Нямеччына. У першую дзясятку таксама ўвайшлі Ісландыя, Ганконг, Швецыя, Сінгапур і Нідэрланды.
Польшча размясцілася на 33 месцы, Расея - на 49-м, Беларусь - на 53-м.
Адзначаецца, што ў пералік уваходзяць 59 вельмі высокаразвітых дзяржаў і толькі 38 краін з нізкім узроўнем чалавечага развіцця. У дакладзе падкрэсліваецца, што ў 2010 годзе гэты ўзровень складаў 46 і 49 краін адпаведна.