Менскі мясакамбінат паставіў прадукцыю за мяжу са стратай больш за $150 тысяч

Экспарт праводзіўся ў Казахстан.

Супрацоўнікамі Менскай раённай пракуратуры пасля праверак устаноўленыя парушэнні выканання і ўкладання знешнегандлёвых дамоў адным з прадпрыемстваў сталіцы, паінфармавалі ў прэс-службе ведамства.

Паведамляецца, што ў студзені мінулага года кіраўніцтва «Менскага мясакамбіната» заключыла з прадпрыемствам у Казахстане дамову куплі-продажу на пастаўкі мяса і каўбас, а таксама паўфабрыкатаў.

- Дамова прадугледжвала ажыццяўленне 100-працэнтнай перадаплаты для паставак. Аднак на справе беларускі бок шматкроць адпраўляў прадукты без грошай. Такім чынам, пакупніку падаваліся неабгрунтаваныя адтэрміноўкі, нават пры наяўнасці непагашанай дэбіторскай запазычанасці, парушаўся парадак правядзення разлікаў за ўжо пастаўленую прадукцыю, - растлумачылі ў пракуратуры.

У выніку замежны контрагент застаўся вінен звыш 10 мільёнаў расейскіх рублёў (больш за 150 тысяч даляраў ЗША).

- Тое ж адбылося і з іншым пакупніком, прадпрыемствам з Расеі. У снежні 2018 года на мясакамбінаце спачатку адгрузілі мясную прадукцыю, а толькі на наступны дзень падпісалі пагадненне, хаця поўная перадаплата тавару так і не была зробленая. Адразу ж бакамі яшчэ была падпісаная спецыфікацыя дамовы, па якой мясакамбінат даў расейскай фірме адтэрміноўку на 2,5 месяцы, - удакладнілі ў прэс-службе.

Расейскі кампаньён да моманту праверкі пракуратуры быў вінен прадпрыемству звыш 1 мільёна рублёў РФ.

На гэты момант прадпрыемству вынесенае пракурорскае прадстаўленне, чатыры службовыя асобы на «Менскім мясакамбінаце» атрымалі дысцыплінарныя спагнанні. Вядома, што з Расеі паступіла ўжо ўся завінавачанасць за экспарт, а казахстанскія партнёры выплацілі толькі 400 тысяч расейскіх рублёў з 10 мільёнаў.

Пададзены пазоў у эканамічны суд.