15 лiстапада 2019, Пятніца, 9:17
Добрая навіна
Рубрыкі

Як хімік з Баранавічаў занялася кандытарскай справай і пачала гатаваць карысныя цукеркі

11
Як хімік з Баранавічаў занялася кандытарскай справай і пачала гатаваць карысныя цукеркі
ТАЦЦЯНА ЦІЦЯНКОВА
ФОТА: АЛЯКСАНДР ЧОРНЫ

Шлях беларускі да стварэння карысных прысмакаў пачаўся з сацсетак.

Жыхарка горада Баранавічы Таццяна Ціцянкова выхоўвае траіх дзяцей. А дзеці, як вядома, вельмі любяць прысмакі, у якіх звычайна шмат цукру. Аднак Таццяна знайшла выйсце: яна навучылася гатаваць смачныя, але пры гэтым карысныя цукеркі. І нават перыядычна вучыць гэтаму іншых мамаў. Напярэдадні Сусветнага дня цукерак, які адзначаецца 18 кастрычніка, яна апавяла intex-press.by пра сваё салодкае хобі, якое можа перарасці ў бізнэс.

Таццяна Ціцянкова паводле адукацыі хімік-тэхнолаг у вытворчасці пластмасаў. Да нараджэння першага дзіцяці яна нават паспела адпрацаваць тры гады паводле спецыяльнасці на буйным нафтахімічным заводзе. Але потым пайшла ў першы дэкрэт, за ім адразу ў другі, а потым і ў трэці. І мацярынства цудоўным чынам ператварыла яе з звычайнага «тэхнара» ў творчую асобу.

– Да таго як з'явіліся дзеці, я меркавала, што ў мяне рукі не з таго месца растуць. Але мацярынства адкрыла ўва мне нейкую творчую жылку. Мне і вырабы ў сад падабаецца рабіць: так я адпачываю душой. Шкада, што часу на творчасць часта не хапае, – кажа Таццяна.

Карысць ад сацсетак

Шлях Таццяны да стварэння карысных прысмакаў пачаўся з сацсетак. Маму траіх дзяцей у нейкі момант вельмі зацікавіла тэма здаровага харчавання. І яна стала чытаць блогі пра карысную ежу.

– Там шмат пісалі пра шкоду цукру. І мяне гэтая тэма вельмі ўсхвалявала, бо ў мяне дзеці, якія вельмі любяць салодкае. Таму я стала думаць, як зрабіць любімыя імі прысмакі карыснымі, – успамінае гараджанка.

Пабадзяўшыся па прасторах інтэрнэту, Таццяна знайшла некалькі рэцэптаў карысных цукерак на аснове натуральных прадуктаў. І пастанавіла паспрабаваць іх прыгатаваць.

– Рэцэптаў у інтэрнэце хапае. Але свой асноўны рэцэпт я вывела метадам спробаў і памылак, змяняючы суадносіны інгрэдыентаў і дадаючы нешта новае. Асноўныя інгрэдыенты, якія я выкарыстоўваю, гэта розныя сухафрукты: фінікі, якія даюць слодыч, арэхі, кунджут, какосавая габлюшка, какава і іншыя натуральныя прадукты, – апавядае Таццяна. – Мае цукеркі, у адрозненне ад звычайных, не ўтрымліваюць ні грама цукру, у іх няма штучных кансервантаў і фарбавальнікаў. Іх можна даваць нават маленькім дзецям, бо яны нясуць толькі карысць.

Дзеці мамчыны карысныя цукеркі ацанілі. І Таццяна стала частаваць імі сваякоў і знаёмых мамаў.

– Аднойчы я пачаставала сваімі цукеркамі знаёмую, якая таксама захапляецца тэмай здаровага харчавання. І яна прапанавала мне правесці майстар-клас у прыгатаванні такіх цукерак для баранавіцкіх мамаў і іх дзяцей. Для мяне гэта быў першы такі досвед, я вельмі хвалявалася, але ў выніку ўсё прайшло добра, усе засталіся задаволеныя. А я зразумела, што людзям гэтая тэма цікавая, – апавядае гараджанка.

Дзе знайсці інгрэдыенты

На тое, каб прыгатаваць адну скрыначку цукерак, трэба нямала часу. Перш за ўсё, каб знайсці і набыць якасныя прадукты. Таццяна кажа, што добрую сухую садавіну і арэхі без праблемаў можна набыць у Баранавічах на рынку, прычым паводле цалкам нядрэннага кошту. А вось з некаторымі іншымі інгрэдыентамі могуць узнікнуць праблемы.

– Нядаўна я стала рабіць карысны мармелад. Ён вельмі падобны на звычайны, толькі ў тэкстуры больш пяшчотны і крохкі. Пры ягоным стварэнні выкарыстоўваецца не жэлацін, а агар – натуральны агент жэле на аснове марскіх водарасцяў. Дык вось агар можна набыць далёка не ў кожнай краме, – апавядае майстарка карысных цукерак.

Калі інгрэдыенты знойдзеныя і набытыя, іх трэба падрыхтаваць. Арэхі Таццяна старанна вымывае, сушыць, а потым яшчэ і замочвае ў вадзе на некалькі гадзінаў: без гэтага якасная салодкая маса для стварэння цукерак не атрымаецца.

Усе інгрэдыенты, якія ідуць у цукеркі, старанна здрабняюцца і змешваюцца, што таксама няпроста, бо маса атрымліваецца вельмі густая. Ну, а на тое, каб скруціць з яе шарыкі, узважыць і абмакнуць іх у кунжут, какосавую габлюшку або іншую абсыпку, сыходзіць менш за ўсё часу.

– У мяне ў доме карысныя цукеркі ёсць заўсёды. І дзеці іх настолькі любяць, што часам нават наляпіць не паспяваю: проста ад гатовай масы шчыкаюць пальцамі і ядуць, – смяецца Таццяна.

Сама ж гараджанка – педантка: любіць, каб цукеркі былі не толькі якасна зробленыя, але і прыгожа спакаваныя, асабліва калі прызначаныя камусьці ў падарунак. Кожную цукерку яна звычайна кладзе ў асобную «спаднічку», а каб спакаваць іх усе, заказвае ў інтэрнэце спецыяльныя скрыначкі.

«Напрацоўваем базу»

Ужо каля года Таццяна Ціцянкова стварае карысныя прысмакі для сваёй сям'і, сяброў і знаёмых. Робіць гэта пакуль не дзеля заробку, а хутчэй, каб удасканальваць уласнае майстэрства. Грошы калі і бярэ, то толькі на прадукты, бо яны не з танных: адна скрыначка цукерак у залежнасці ад інгрэдыентаў можа абысціся на суму ад 3 да 13 рублёў. Але, кажа дзяўчына, у апошні час яна ўсё больш сур'ёзна задумваецца пра тое, каб ператварыць сваё хобі ў працу і крыніцу прыбытку.

– Калі шчыра, калі я стала рабіць гэтыя цукеркі для сябе, нават не думала, што тэма здаровых прысмакаў настолькі зацікавіць людзей. Але попыт ёсць, а ў мяне ў галаве куча ідэй, – кажа Таццяна. – Для сябе я пастанавіла, што на працу ў спецыяльнасці дакладна не вярнуся. І ў будучыні хацела б займацца стварэннем карысных прысмакаў. Але хачу, каб усё было афіцыйна, таму цяпер напрацоўваю базу, каб можна было ўсё аформіць.

Паводле ейных словаў, у цяперашні час яна вывучае і спрабуе ствараць новыя карысныя прысмакі, каб у яе быў асартымент, з якім можна было б адкрываць сваю справу. Яна ўжо пачала ствараць карысны мармелад, хоча паспрабаваць рабіць «жывы» шакалад, кеш’ю-капкейкі. А яшчэ падумвае пра тое, каб замовіць адмысловыя налепкі або шыльдачкі, на якіх можна было б паказваць склад, каб людзі, якім цукеркі трапляюць у рукі, бачылі, што яны натуральныя і карысныя.

– Я мяркую, у кожнай мамы павінен быць нейкі прыемны, творчы занятак. А калі ён яшчэ і прыбытак пачне прыносіць, увогуле добра, – рэзюмуе майстрыха. – Харчаванне вельмі важнае для здароўя. І я не супраць прысмакаў, але мяркую, што ўсё павінна быць у меру. Прынамсі дома мае дзеці ядуць карысную ежу.