Як Лукашэнка да Клінтана ў сябры набіваўся

Стасункі ў дыктатара з кіраўнікамі Белага дому відавочна не склаліся.

Лукашэнка зноў выказаўся пра амерыканскіх прэзідэнтаў. А якія ў яго складваліся стасункі з імі на самай справе? Пра гэта матэрыял udf.by.

Калі верыць Аляксандру Лукашэнку, то Біл Клінтан, які кіраваў ЗША да 2001 года, яму ледзь не сябар. Яшчэ гадоў дзесяць таму прэзідэнт Беларусі сцвярджаў, што «нават калі ён ужо не быў прэзідэнтам, мы па-сяброўску размаўлялі».

Сёлета аповеды Лукашэнкі выйшлі на новы ўзровень. Вясной ён заявіў, што Клінтан «добры амаль сябар, мы з ім у добрых стасунках да гэтага часу». А на мінулым тыдні ён павесяліў усіх аповедам пра прапанову амерыканскаму прэзідэнту ўзначаліць «саюзную дзяржаву».

На самай справе даказаць праўдзівасць словаў Лукашэнкі немагчыма. З Клінтанам ён бачыўся ўсяго некалькі разоў і, з усяго відаць, мімаходам. Самы вядомы момант іх зносінаў адбыўся ў 1999 годзе ў Стамбуле на саміце АБСЕ. Што даказвае наступная фатаграфія.

Клінтан тады не збіраўся мець зносіны з Лукашэнкам, які да таго часу ўжо ператварыўся амаль у ізгоя для дэмакратычных краінаў. Але раптам падляцелы Лукашэнка схапіў прэзідэнта ЗША за руку і той быў вымушаны перакінуцца з ім некалькімі словамі.

«Тэрарыст» Буш

На мінулым тыдні Лукашэнка расказаў, як нібыта напісаў Джорджу Бушу-малодшаму ліст, у якім прапанаваў знайсці прыпісаныя яму 13 мільярдаў даляраў і забраць сабе. Але гэта не самая яркая старонка ў іх стасунках.

Пасля абрання прэзідэнтам ЗША Джорджа Буша-малодшага лёс Лукашэнкі, здавалася, вісеў на валаску. У 2005-м Дзяржсакратарка Кандаліза Райс назвала яго апошнім дыктатарам Еўропы і заявіла, што яму нядоўга заставацца ва ўладзе.

Пасля Кангрэс ЗША з ініцыятывы Буша ўвёў у дачыненні да беларускіх уладаў санкцыі.

Лукашэнка быў у лютасці. Ён назваў амерыканскага прэзідэнта «першым тэрарыстам на нашай планеце».

Асабіста палітыкі ніколі не сустракаліся: Буш ціснуў рукі толькі прадстаўнікам беларускай апазіцыі.

«Уражвальны» Абама

Пры «голубу» Бараку Абаму амерыканская палітыка ў дачыненні да ўладаў Беларусі і асабіста Лукашэнкі не змянілася. Тым больш яны далі новую нагоду для санкцыяў – жорсткі разгон Плошчы-2010 і наступнае закручванне гаек у краіне.

Абама спраўна падаўжаў санкцыі, не надзяляючы Лукашэнку асобнай гутаркі. Кіраўніку Беларусі гэта спадабацца не магло, тым больш, што з ягонага боку прадпрымаліся спробы нармалізаваць стасункі. Лукашэнка, напрыклад, заклікаў амерыканцаў «даць папрацаваць» Абаму, залішне яго не крытыкуючы.

Аднойчы здалося, што кіраўнік Беларусі нават перайшоў мяжу ў сваіх выказваннях у дачыненні да прэзідэнта ЗША: «І ўвогуле мяне Абама здзіўляе. Яшчэ зусім нядаўна чарнаскурыя ў Амерыцы рабамі былі, сёння ўжо пра выключнасць нейкую заяўляюць. Я ніколі не думаў, што чалавек, які выйшаў з гэтых бедных слаёў, зможа рыторыку такую ў свеце праводзіць».