Навукоўцы плануюць выяўляць паспяховых спартоўцаў праз генетычны тэст
5- 21.11.2019, 21:28
- 9,053
На гэтым этапе дакладнасць тэсту спартыўнай паспяховасці складае 35%.
У міжнароднай камандзе навукоўцаў цяпер больш за 50 чалавек з Расеі, Вялікабрытаніі, Польшчы, Японіі, Аўстраліі і ЗША, якія працуюць у 30 лабараторыях ва ўсім свеце, паведамляе twnews.se.
Першапачаткова навукоўцы працуюць са зборнымі камандамі сваіх краін, бо ім патрэбныя ўзоры менавіта паспяховых прафесійных спартоўцаў. У іх геноме яны шукаюць агульныя асаблівасці, якія дапамаглі ім стаць найлепшымі ў сваёй справе.
У будучыні навукоўцы змогуць параўноўваць геномы дзяцей з ДНК прафесійных спартоўцаў, каб вызначыць схільнасці і таленты да асобных тыпаў спорту. Напрыклад, калі ў дзіцяці ДНК падобнае з генамі спрынтараў, значыць, яно зможа атрымаць поспех у гэтых відах спорту, дзе трэба хутка рухацца.
«Асноўная тэма - гэта выяўленне спадчыннай абумоўленасці спартыўнага таленту і распрацоўка такога тэсту, які дазволіць у будучыні вызначаць, у якіх тыпах спорту дзіця можа быць паспяховым. Другі напрамак арыентаваны на дзейных спартоўцаў, якім трэба дапамагчы ў выбары найбольш эфектыўнай методыкі трэніроўкі», - распрацоўшчык праекта Ільдус Ахметаў.
Навукоўцы адзначаюць, што з дакладнасцю немагчыма назваць адзін тып спорту, у якім дзіця будзе паспяховым. Як правіла, дзіця можа быць схільнае да 20 тыпаў спорту з 100 існых.
Пры гэтым цяпер дакладнасць тэсту спартыўнай паспяховасці складае 35%, у найбліжэйшай будучыні навукоўцы маюць намер павысіць гэты паказчык да 70%.