ЗША ўвялі санкцыі супраць золатаздабывальнай кампаніі Венесуэлы

ЗША пашырылі санкцыі супраць рэжыму Мадура.

Адміністрацыя ЗША ўвяла новыя санкцыі супраць рэжыму дыктатара Венесуэлы Нікаласа Мадура. Гэтым разам яны закранулі золатаздабывальны сектар. ЗША ўнеслі ў санкцыйны спіс горнае дзяржпрадпрыемства CVG Compañía General de Minería de Venezuela, якое займаецца золатаздабычай, а таксама яго прэзідэнта, паведаміла ў аўторак, 19 сакавіка, міністэрства фінансаў у Вашынгтоне, паведамляе DW.

Актывы кампаніі і яго кіраўніка Адрыяна Антоніа Пердамо Мата ў ЗША замарожваюцца, з імі забараняецца весці бізнэс.

Міністр фінансаў ЗША Стывен Мнучын абвінаваціў рэжым Мадура ў тым, што дзеля ўласнага ўзбагачэння ён безадказна мантачыць багацце, маёмасць і карысныя выкапні Венесуэлы. Горнае прадпрыемства падтрымлівае цеснае атачэнне карупцыйнага рэжыму Мадура, сцвярджае кіраўнік амерыканскага Мінфіна.

Раней ЗША ўвялі санкцыі ў дачыненні да нафтавага сектара Венесуэлы, між іншым, дзяржаўнай нафтавай кампаніі PDVSA, а таксама супраць расейскага «Еўрафінанс Маснарбанка» праз падтрымку рэжыма Нікаласа Мадура.