Раўкоў і Карпенка маюць намер скіраваць у школы больш палітрукоў

У Беларусі збіраюцца «павысіць якасць давайсковай падрыхтоўкі ў школах».

Мінабароны і Мінадукацыі ўдасканальваюць давайсковую падрыхтоўку ў школах. Пра гэта паведаміў сёння журналістам міністр абароны Андрэй Раўкоў, паведамляе БелТА.

Міністэрствы маюць намер паляпшаць давайсковую падрыхтоўку ў школах. "Мы робім для гэтага практычныя крокі", – сказаў Андрэй Раўкоў. Сярод іншага, плануецца падняць статус ваенрукоў, якія вядуць у школах заняткі давайсковай падрыхтоўкі.

Андрэй Раўкоў адзначыў, спаслаўшыся у тым ліку на меркаванне маладых людзей, якія пайшлі ў запас, што давайсковую падрыхтоўку павінен выкладаць чалавек, які сам служыў у войску

Паводле словаў міністра адукацыі Ігара Карпенкі, плануецца дааснасціць цэнтры давайсковай падрыхтоўкі.

"Міністэрства абароны вельмі актыўна ў гэтым кірунку працуе і на нашы заяўкі пастаўляе абсталяванне", – сказаў ён.

Акрамя таго, скарэктаваная нарматыўная база, звязаная з дзейнасцю ваенна-патрыятычных класаў. Распрацаваны факультатыў для 8–9-х класаў для ўвядзення ў давайсковую падрыхтоўку. Сур'ёзная ўвага аддаецца павышэнню якасці адукацыі ў кадэцкіх вучэльнях і спецыялізаваных ліцэях.