Падаражэюць візы, пералічаць «дармаедаў»: Што зменіцца ў Беларусі з лютага

Многія навінкі ўдараць па кішэнях грамадзянаў.

З 1 лютага ў Беларусі падымуць дапамогу на дзяцей, а таксама падвысяць кошты на некаторыя маркі цыгарэтаў (у некаторых выпадках адразу на 35 капеек). З наступнага месяца для беларусаў падаражэюць візы ў шэнген. Улады таксама перагледзяць бюджэт пражытковага мінімуму і мінімальныя працоўныя і сацыяльныя пенсіі. Бюджэтнікам студзеньскія заробкі будуць разлічаныя паводле новых правілаў. Партал tut.by паглядзеў, якія змены паўплываюць на памер гаманцоў, што чакае беларусаў у лютым.

Банкі ўводзяць камісію за плацяжы гатоўкай у касах

Банкі пераглядаюць камісію за прыём аплатаў гатоўкай у касах. Так, Paritetbank з 1 лютага ўвядзе камісію за прыём і пералічэнне гатовых грашовых сродкаў ва ўсіх касах у выплатах на карысць вытворцаў паслуг – удзельнікаў АРІП. Цяпер гэтую камісію спаганяюць не ва ўсіх касах. За кожную аплату трэба заплаціць 2 рублі. Не трэба плаціць камісію пры здзяйсненні плацяжоў у дзяржбюджэт – падаткаў, збораў, мытаў, штрафаў.

Раней БПС-Ашчадбанк з 20 студзеня павысіў камісію за прыём гатовых грошай і здзяйсненне аперацыі праз банкаўскую аплатную картку ў касе банка ў плацяжах на карысць вытворцы паслуг з 3 да 5 рублёў. Узнагароджанне спаганяецца за кожную аплату. Беларусбанк таксама сёлета перагледзеў збор узнагароджанняў за аперацыі фізічных асобаў. Камісія за прыём гатовых грашовых сродкаў (здзяйсненне аперацыі праз банкаўскую аплатную картку) у касе банка ў плацяжах на карысць вытворцаў паслуг вырасла да 2 рубля за кожную аплату.

Шэнгенскія візы падаражэюць да 80 еўраў

З 2 лютага 2020 года пачне дзеянне перагледжаны Візавы кодэкс Еўразвязу, які, апроч іншых зменаў, прадугледжвае павелічэнне візавага збору для грамадзянаў усіх краінаў – да 80 еўраў. Для Беларусі такое павелічэнне будзе часовым, толькі да пачатку дзеяння падпісанага 8 студзеня 2020 года Пагаднення пра спрашчэнне візавага рэжыму паміж ЕЗ і Беларуссю, у адпаведнасці з якім візавы збор аўтаматычна і назаўжды знізіцца з 80 да 35 еўраў для грамадзянаў Беларусі. Пагадненне пачне дзеянне, як мяркуецца, з 1 чэрвеня.

Абновяць базу «дармаедаў»

У Беларусі ў лютым абновяць спіс працаздольнага насельніцтва, якое «не занятае ў эканоміцы». Тым, хто трапіць у яго і ў каго ёсць ва ўласнасці жыллё, давядзецца аплачваць паводле поўных тарыфаў гарачае водазабеспячэнне.

Нагадаем, першыя спісы «не занятых у эканоміцы» сфармавалі на 1 лютага 2019 года. Пасля гэтага іх штоквартальна абнаўляюць. Дакументы, якія пацвярджаюць працу або навучанне за мяжой, трэба падаць у камісію каардынацыі працы ў спрыянні занятасці да 21 кастрычніка, 21 студзеня, 21 траўня і 21 ліпеня адпаведна.

Планавалася, што «дармаеды» з кастрычніка 2019 года будуць поўнасцю аплачваць ацяпленне і газ. Аднак улады перанеслі гэты тэрмін на 1 траўня 2020 года.

Пры гэтым па-ранейшаму невядома, колькі чалавек знаходзіцца ў базе не занятага ў эканоміцы насельніцтва і колькі з іх ужо атрымліваюць пацяжэлыя жыроўкі. Мінпрацы не раскрывае гэтую інфармацыю. Раней міністр працы і сацыяльнай абароны Ірына Касцевіч заяўляла, што ў базе «не занятых у эканоміцы» блізу 500 тысячаў чалавек. Адкуль знайшлі столькі ўтрыманцаў і хто патрапіў у гэтую базу, міністарка не ўдакладняла. Ірына Касцевіч таксама не патлумачыла, ці ўключаюць у іх лік бацькоў дзяцей да 7 гадоў і тых, у каго ёсць прысядзібныя і сельскагаспадарчыя надзелы. Калі з улікам гэтых катэгорый, то атрымліваюцца адны лікі, а калі без уліку, то меншыя.

Бюджэтнікі атрымаюць заробкі паводле новых правілаў

У лютым бюджэтнікі атрымаюць студзеньскія заробкі, якія будуць разлічаныя паводле новых правілаў. Нагадаем, для бюджэтнікаў з 1 студзеня ўвялі новую схему разліку заробкаў. Адна з асноўных зменаў: тарыфную стаўку першага разраду замянілі на базавую стаўку. Улады раней запэўнівалі, што праз новую схему падзення заробкаў не павінна адбыцца, але без уліку прэмій.

У Мінпрацы раней растлумачылі, чаму студзеньскія заробкі ў некаторых выпадках могуць быць ніжэйшыя за снежаньскія. Пры параўнанні заробкаў за снежань і студзень чыноўнікі не будуць браць да ўвагі многія даплаты, якія працаўнікі могуць атрымаць у апошні месяц года. Да прыкладу, начныя змены, сумяшчэнне, замену часова адсутнага працаўніка, за звышурочную працу, за выхад у выходны і святы. Калі ад снежаньскага заробку адабраць ўсе гэтыя даплаты, то ў студзені заробкі не будуць ніжэйшыя, чым месяц таму.

Падаражэюць цыгарэты, на тытунёвы рынак выйдзе новы гулец

У Беларусі з 1 лютага падаражэюць цыгарэты. На некаторыя цыгарэты кошты вырастуць адразу на 35 капеек. Пры гэтым на тытунёвы рынак выходзіць новы гулец – кампанія «Інтэр Табака» бізнэсоўца Аляксея Алексіна. Раней гэтай кампаніі дазволілі імпартаваць у Беларусь цыгарэты L&M, Parliament, Marlboro, а таксама арганізаваць вытворчасць тытунёвых вырабаў на тэрыторыі прамысловай зоны Шабаны.

Са спісам цыгарэтаў, якія падаражэюць з 1 лютага, можна пазнаёміцца на сайце МПЗ.