Краіны ЕЗ ухвалілі прымяненне пагаднення аб Brexit з 1 студзеня

Еўрапарламент ратыфікуе пагадненне аб Brexit прамінулай датай у пачатку 2021 года.

Усе 27 краін-удзельніц Еўразвязу ўхвалілі часовае прымяненне з 1 студзеня 2021 года пагаднення ЕЗ і Вялікабрытаніі аб гандлі і супрацоўніцтве. Пра гэта ў аўторак, 29 снежня, паведаміў прэс-сакратар пастаяннага прадстаўніцтва Нямеччыны пры ЕЗ Себасцьян Фішэр, паведамляе DW.

Чакаецца, што старшыня Еўракамісіі Урсула фон дэр Ляен (Ursula von der Leyen) і старшыня Еўрапейскай рады Шарль Мішэль падпішуць дакумент раніцай 30 снежня. Пазней подпіс павінен паставіць і прэм'ер-міністр Вялікабрытаніі Барыс Джонсан. Еўрапарламент жа ратыфікуе пагадненне па «Брэкзіту» прамінулай датай у пачатку 2021 года.

Пагадненне аб двухбаковым гандлі было дасягнута 24 снежня, усяго за некалькі дзён да выхаду Вялікабрытаніі з еўрапейскага ўнутранага рынку. Яно прадугледжвае свабодны гандаль і адсутнасць мытаў. Акрамя таго, у ім прапісаны палажэнні, якія тычацца будучага супрацоўніцтва Брусэля і Лондана ў сферы паліцыі і юстыцыі, а таксама сацыяльнага забеспячэння грамадзян абодвух бакоў.

Доўгі шлях да выхаду з ЕЗ

Вялікабрытанія выйшла з Еўразвязу ў студзені 2020 года, праз 43 месяцы пасля перамогі прыхільнікаў «Брэкзіта» на рэферэндуме 2016 года. А 31 снежня завершыцца пераходны перыяд, падчас якога Лондан захоўвае доступ да ўнутранага еўрапейскага рынку, і застаецца ў мытным звязе, пры гэтым абавязаны прытрымлівацца правілаў Еўразвязу ва ўсіх сферах, але не ўдзельнічае ў прыняцці пастаноў у ЕЗ.