«З пад'езда выносілі мумію»

Мёртвая мянчанка больш за два гады праляжала ў кватэры пры ўключанай газавай фаерцы.

Скрыня гэтай кватэры на Пляханава забітая рахункамі па самае не хачу. Апошняя - амаль на тры тысячы рублёў - даволі акуратна складзеная і тырчыць вонкі. Відаць, што яе ўжо вывучалі дапытлівыя суседзі. Сям'я з трох жанчын - маці і дачок - жыла ў панэльным доме з дня засялення жыльцоў у дзявяціпавярховік. Гэта значыць, з 1975-га. Суседзі распавядаюць, што маці была даволі таварыскай жанчынай. Бяскрыўднай, хоць і выпівала. Пра дачок такога сказаць не могуць: жанчыны вялі цвярозы лад жыцця, але ні з кім не віталіся і не жадалі працаваць, піша onliner.by.

У 2000-х у маці сямейства здарыўся інсульт. Дочкі не хацелі за ёй даглядаць, у пад'езд з кватэры цягнуўся ванітны пах ляжачага чалавека. Дочкі - Святлана і Таццяна - наважылі аддаць маці ў дом састарэлых.

- Старэйшая, Света, аднойчы прыходзіць да мяне і кажа, маўляў, дайце пашпарт - прыедзе натарыус, хачу маму адправіць у дом састарэлых. Я стала сведкай і сказала, што добра стаўлюся да іх маці і што яе не варта адпраўляць у інтэрнат. Але за ёй ніхто не даглядае, у кватэры пахла... І яны вельмі-вельмі бедна жылі, - распавядае суседка Тамара Сямёнаўна.

Аднойчы яна прынесла сваёй знаёмай варэнне і спытала, чаму іх малодшая Таня не працуе. Але яе ніхто ў сям'і не асуджаў, толькі казалі, што тая забірала пенсію ў маці. У 2013-м тая памерла. Святлана і Таня засталіся адны. Больш сваякоў у іх не было.

- Пасля гэтага я пыталася ў Тані, ці працуе яна. Адказвала, што не. Я прапаноўвала аддаць ёй такую-сякую вопратку, але яна адмаўлялася. Пазней бачу - Таня ў добрым светлым паліто. Выявілася - старэйшая сястра стала працаваць і ўтрымлівала сябе і Таню, - кажа суседка.

У 2015-м да дому пад'ехала хуткая і катафалк - памерла і Святлана. Чаму, ніхто не ведае дагэтуль.

- Адна суседка спытала ў Тані, чаму памерла яе сястра, але тая толькі вызверылася: не ваша справа, - распавядае іншая суседка Наталля (імя змененае на яе просьбу).

Таня жыла далей. Нідзе не працавала, яе амаль ніхто не бачыў - увесь час сядзела дома. А потым жанчына стала хадзіць па сметніках.

- Я прапанавала накарміць яе, але Таня адмовілася. Яны ніколі не прымалі пачастункаў. Пасля гэтага я не бачыла Таню, але суседзі казалі, што сустракалі яе з дзвюма жанчынамі - хадзіла на вуліцы, - узгадвае Тамара Сямёнаўна. - Мы з больш маладой суседкай падыходзілі да дзвярэй кватэры праверыць, пахне ці не пахне, нюхалі, але нічога не было чуваць. Кажуць жа, што газ гарэў, але было б чуваць цяпло нейкае - нічога не было.

Суседка Наталля ўпэўненая: Тані не стала ў жніўні 2017 года. Іх кватэры знаходзяцца ў адным тамбуры, і Наталля заўсёды чула, як нехта заходзіў. Але з 2017 года надышла цішыня.

- Па дому хадзілі газаўшчыкі, у кватэру Тані стукалі судовыя прыставы (магчыма, праз вялікую запазычанасць па рахунку. - Заўвага.), але ў яе кватэру ніхто не мог патрапіць. Мы даўно западозрылі нешта дзіўнае і прасілі ўчастковага зайсці і праверыць. Але, мабыць, ніхто так і не прыходзіў, - кажа мянчанка.

Усе праяснілася ў мінулую пятніцу, 14 лютага. Суседка Тані знізу заўважыла плямы на столі, забіла трывогу і выклікала спецыялістаў. Узламалі замок, знайшлі Таню мёртвай у кватэры - адну, сярод акуратна расстаўленых мяшкоў са смеццем і з уключанай газавай фаеркай.

- Я бачыла ў акно... Мумія - колерам цямнейшая за гэта (паказвае на карычневую кухонную шафку. - Заўвага.). Ногі скурчаныя, высахлая, але чамусьці голая была. Суседка, якая была сведкай, распавяла: галава была з кулачок.

Сёлета Тані мог бы споўніцца 51 год.

- Калі б я ведала, што газ! - усклікае напрыканцы суседка Наталля. - Пасля выбуху ў доме непадалёк я так гэтага баюся! Нават на дзверы павесіла памятку для сына, каб абавязкова перакрываў перад адыходам. Але памятка не дапамагла б, калі б там здарыўся выбух... Атрымліваецца, два гады мы жылі як на парахавой бочцы.

Следчыя, міліцыя і судмедэкспэрты агледзелі месца здарэння.

- Для высвятлення дакладнай прычыны смерці прызначаная судова-медыцынская экспэртыза. Усе абставіны высвятляюцца, - паведамілі ва УСК Менску.