У Кіеве дэпутат Вярхоўнай Рады Давідзенка знойдзены мёртвым з агнястрэльным раненнем у галаву
- 23.05.2020, 20:42
- 28,620
Цела ўкраінскага народнага дэпутата выявіла прыбіральшчыца.
Народны дэпутат з групы «Довіра» Валерый Давыдзенка сёння ўвечары быў знойдзены мёртвым у сваім офісе на вуліцы Вялікая Васількоўская. Пра гэта паведаміў тэлеканал «Еспресо», а таксама народны дэпутат ад «Апазіцыйнай платформы - За жыццё» Ілля Ківа ў Telegram, паведамляе gordonua.com.
«Давыдзенка знайшлі з агнястрэльным раненнем у галаву. З вялікай верагоднасцю, гэта было самагубства», - адзначае «Еспресо».
Ківа таксама паведаміў, што цела Давыдзенкі было знойдзенае ў яго офісе, але не прывёў ніякіх дэталяў.
Былы народны дэпутат ад Блока Пятра Парашэнкі Сяргей Лешчанка ў Telegram са спасылкай на паліцыю заявіў, што цела народнага дэпутата знайшла прыбіральшчыца (на момант публікацыі навіны паведамленняў пра інцыдэнт на сайце кіеўскага ўпраўлення Нацыянальнай паліцыі не было). Побач з загінулым быў пісталет.
Інфармацыю пра гібель народнага дэпутата пацвердзіў намеснік міністра ўнутраных спраў Украіны Антон Герашчанка. З ягоных слоў, паліцыя і пракуратура «разглядаюць усе магчымыя версіі трагедыі, што здарылася».
47-гадовы Валер Давыдзенка быў абраны ў Вярхоўную Раду па 208-й акрузе (Чарнігаўская вобласць) як самавылучэнец, уваходзіў у дэпутацкую групу «Довіра» са снежня 2019 года.