Volvo прэзентавала электрычны мінівэн са «скандынаўскай гасцёўняй»

Фотафакт.

Швэдская кампанія Volvo афіцыйна прэзентавала свой першы электрычны мінівэн EM90. Пра гэта паведамляе Elektrek.

Запас ходу ў рэжыме CTLC складае больш за 724 км, што робіць яго канкурэнтаздольным на кітайскім аўтамабільным рынку. EM90 будзе мець універсальнае выкарыстанне як для сямейных паездак, так і для бізнэсу. Мінівэн пабудаваны на базе прыналежнага кампаніі Geely брэнду ZEEKR 009 і мае скандынаўскі дызайн са сваімі ўнікальнымі рысамі.

EM90 сілкуецца акумулятарам ёмістасцю 116 квт г і можа быць зараджаны ад 10% да 80% менш як за 30 хвілінаў. Дзякуючы электрарухавіку магутнасцю 200 квт мінівэн можа разганяцца ад 0 да 100 км/ч за 8,3 секунды. Акрамя таго, ён аснашчаны абсталяваннем для двухбаковай зарадкі і можа выкарыстоўвацца ў якасці мабільнага павербанка. Volvo таксама дадала свае знакавыя функцыі бяспекі і тэхналогіі шумапрыглушэння, каб забяспечыць камфорт і цішыню падчас паездак.

Інтэр'ер EM90 распрацаваны для максімальнага камфорту і мае доўгія сядзенні і вялікі забаўляльны экран. Ён таксама абсталяваны дадатковым экранам у дашбордзе, які можна размяшчаць для розных забаваў або функцый, як тэатр, гасцёўня або перамоўны пакой. Акрамя таго, мінівэн атрымаў перадавыя кампутарныя тэхналогіі, у тым ліку платформу Snapdragon Cockpit ад Qualcomm.

EM90 ужо даступны для папярэдняй замовы ў Кітаі з пачатковым коштам 818000 юаняў ($ 114000). Кампанія не раскрыла, на якіх іншых рынках мінівэн будзе даступны. У Volvo адзначаюць, што EM90 гэта першы электрычны мінівэн на рынку Кітая.