У Туркменістане прыдумалі, як загасіць «Браму пекла»

Газавы кратар гарыць больш за 50 гадоў.

Спецыялісты дзяржканцэрна «Туркменгаз» падрыхтавалі праект тушэння газавага кратара Дарваза ў пустыні Каракумы, які загарэўся больш за 50 гадоў таму праз абвал выведнай шахты. Пра гэта ТАСС паведаміла загадчыца лабараторыі Навукова-даследчага інстытута (НДІ) прыроднага газу канцэрна Ірына Лур'ева.

«У нас складзены праект, асноўная сутнасць якога – абмежаваць прыток газу да гэтай аварыйнай свідравіны», – сказала Лур'ева, дадаўшы, што прапанова «знаходзіцца на стадыі ўхвалення» профільных установаў.

Паводле ейных словаў, радовішча, на якім адбылася аварыя, мае вельмі складаную геалагічную будову, што характарызуецца мноствам вельмі тонкіх пластоў пароды, якія залягаюць неглыбока ад паверхні – да 1 тыс. метраў. Аварыя таксама адбылася недалёка ад паверхні, адбылося абвальванне ствала свідравіны, пасля чаго пайшло няспыннае нерэгуляванае падсілкоўванне газу.

Навукоўцы вывучылі розныя варыянты развязання праблемы падпаленага кратара і прыйшлі да высновы, што адзіны з іх – прасвідраваць свідравіну недалёка ад радовішча, якая будзе адбіраць газ.

«Дарваза» або «Брама пекла» (афіцыйная назва «Ззянне Каракумаў») – адна з турыстычных славутасцяў краіны.

Вогненны газавы кратар у мястэчку Дарваза, званы ў народзе «Брама пекла», а афіцыйна «Ззянне Каракумаў» – адна з турыстычных славутасцяў краіны. Ён размешчаны ў цэнтры пустыні Каракумы, прыкладна за 260 кіламетраў на поўнач ад Ашхабада.

У 1971 годзе савецкія геолагі выявілі ў гэтай мясцовасці сховішча прыроднага газу, і прасвідраваўшы свідравіну, выклікалі абвал – верхнія пласты глебы проста абваліліся ў падземную пячору, адкрыўшы вялікую дзірку, напоўненую газам. Каб унікнуць атручэння газам людзей і жывёлы, геолагі пастанавілі падпаліць яго, мяркуючы, што з часам агонь аціхне. Але газ, які вырываецца, прадаўжае гарэць да гэтага часу.

Дыяметр газавай дзіркі – 60 метраў, глыбіня – блізу 20 метраў. Слупы полымя, што выходзяць з каверны пад кратарам і з'яўляюцца ў выніку згарання прыроднага газу, могуць дасягаць 15 м у вышыню.

У пачатку 2022 года Гурбангулы Бердымухамедаў, які займаў тады пасаду прэзідэнта Туркменістана, запатрабаваў ад ураду знайсці развязанне праблемы, паколькі «ўжо шмат гадоў у гэтай мясцовасці згарае велізарная колькасць газу, што негатыўна адбіваецца на экалогіі і здароўі насельніцтва раёна».