Апытанне: Стаўленне да ЗША ў свеце застаецца станоўчым

Лепш за ўсё да ЗША ставяцца ў Польшчы.

Стаўленне да ЗША і прэзідэнта краіны Джо Байдэна ў свеце застаецца станоўчым, вынікае з вынікаў сацыялагічнага даследавання кампаніі Pew Research Center, праведзенага ў 23 краінах Паўночнай Амерыкі, Еўропы, Блізкага Усходу, Азіяцка-Ціхаакіянскага рэгіёну, Афрыкі і Лацінскай Амерыкі. Звесткі апытання апублікаваныя ў аўторак, 27 чэрвеня.

Overall views of the U.S. are largely positive. A median of 59% give the U.S. a favorable rating. Hungary is the only country surveyed where fewer than half see the U.S. favorably.https://t.co/925tX58I4c pic.twitter.com/43ZTUO4RD8

— Pew Research Global (@pewglobal) June 27, 2023

У сярэднім ва ўсіх краінах 59% рэспандэнтаў адказалі, што станоўча ацэньваюць ролю ЗША ў свеце, 30% – што негатыўна. Лепш за ўсё з апытаных краінаў да ЗША ставяцца ў Польшчы, дзе пра гэта заявілі 93% адсоткі рэспандэнтаў. Гэты паказнік рэзка вырас пасля расейскага ўварвання ва Украіну, адзначаюць аўтары даследавання.

У Ізраілі пра добрае стаўленне да ЗША заявілі 87% апытаных – гэта другі паказнік сярод краінаў выбаркі. У Нямеччыне палітыку ЗША станоўча ацэньваюць 57% апытаных – у параўнанні з 66% летась. Адзінай краінай, у якой стасункі да ЗША адмоўныя, стала Вугоршчына. Тут 51% апытаных сказаў, што негатыўна ставіцца да краіны і яе прэзідэнта.

Пераважная колькасць рэспандэнтаў ва ўсіх краінах выбаркі пагадзіліся, што ЗША ўмешваюцца ў справы іншых краінаў свету (82 адсоткі апытаных). Пры гэтым у сярэднім 61% рэспандэнтаў лічыць, што ЗША спрыяюць міру і стабільнасці ва ўсім свеце. У сярэднім 54% апытаных выказалі ўпэўненасць у Байдэну, 30% адказалі, што не адчуваюць яе.