Кампанія EPAM зноў першая ў падатках у літоўскім IT

Wargaming – на другім месцы.

Кампанія EPAM паводле вынікаў першага паўгоддзя вярнула сабе статут найбуйнейшага падаткаплацельніка ў літоўскім ІТ. Лідар першага квартала Wargaming на другім месцы, піша devby.io.

Паводле звестак Дзяржаўнай падатковай інспекцыі пры літоўскім Мінфіне, за студзень – чэрвень EPAM Sistemos заплаціла ў літоўскі бюджэт амаль 11 мільёнаў еўраў падаткаў. Гэта ў 4 разы больш, чым за аналагічны леташні перыяд (2,7 мільёна еўраў). Больш за тое, памер падатковых адлічэнняў ужо большы, чым за ўвесь мінулы год.

Нагадаем, у 2022 годзе кампанія заплаціла ў літоўскі бюджэт 10,4 мільёна еўраў падаткаў, то-бок на 0,6 мільёна даляраў менш, чым за шэсць месяцаў гэтага года.

Пры захаванні такой дынамікі адлічэнняў агульны памер падаткаў паводле вынікаў гэтага года можа вырасці да 25 мільёнаў еўраў. Калі за першы квартал бюджэт Літвы атрымаў ад EPAM 4 мільёны еўраў падаткаў, то за другі квартал – блізу 7 мільёнаў еўраў.

Літоўскі офіс EPAM па-ранейшаму самы буйны сярод ІТ-кампаній з беларускімі каранямі. У двух офісах – Вільні і Каўнасе – зарэгістравана больш за 1,4 тысячы супрацоўнікаў. Праўда, з пачатку года агульная колькасць спецыялістаў нязначна скарацілася за кошт віленскага офіса. На гэты момант тут зарэгістравана блізу 1360 чалавек, у камандзе офіса ў Коўне – 110 супрацоўнікаў.

І EPAM Sistemos, і Wargaming Vilnius паводле вынікаў першага паўгоддзя чакана ў топ-100 найбуйнейшых падаткаплацельнікаў Літвы. «Дачка» EPAM на 55 месцы ў рэйтынгу, а «дачка» Wargaming на 73 месцы.

У топ-50 падаткаплацельнікаў сектару «інфармацыя і сувязь» яшчэ чатыры кампаніі з беларускімі каранямі: Andersen (4,4 мільёна еўраў выплачаных падаткаў), Gurtam (2,6 мільёна еўраў), Melsoft (2,4 мільёна еўраў) і Flo (1,5 мільёна еўраў).