The Telegraph: Украіна будуе сваю грандыёзную «лінію Суравікіна»

У тым ліку і на мяжы з Беларуссю.

Кіеў пачаў будаўніцтва маштабных ліній абароны ўздоўж лініі фронту, а таксама на мяжы з Расеяй і Беларуссю.

Украіна, перайшоўшы да тактыкі актыўнай абароны, пачала ў тэрміновым парадку ўзводзіць грандыёзныя абарончыя лініі на ключавых адцінках фронту. Іх даўжыня перавышае 1000 км.

Пра гэта гаворыцца ў артыкуле выдання The Telegraph. Выданне называе грандыёзныя абарончыя збудаванні «ўкраінскай лініяй Суравікіна».

Сотні кіламетраў траншэй, бетонных «зубоў дракона», падземных апорнікаў і камандных пунктаў хутка ўзводзяцца ўздоўж усёй лініі фронту.

Гэта частка тактыкі актыўнай абароны, пераход да якой у канцы мінулага 2023 абвясціў прэзідэнт Украіны Уладзімір Зяленскі.

Асабліва актыўна ўкраінцы ўзмацняюць свае тылы пад Ліманам, Аўдзееўкай і Купянскам, дзе расейскае войска актыўна наступае.

Новыя абарончыя лініі з'яўляюцца не толькі ля фронту, але і ўздоўж межаў з Расеяй і Беларуссю.

Узмоцненыя лініі абароны, як адзначаюць журналісты, яшчэ мацней запаволяць надыходзячае войска РФ, а таксама зменшаць страты ўкраінскага.

Акрамя таго, УСУ будзе патрабавацца меншая колькасць войскаў для ўтрымання фронту.

Разам з тым новая тактыка кажа аб тым, што Кіеву на гэтым этапе давялося ўтаймаваць свае амбіцыі па дэакупацыі тэрыторый, захопленых войскам РФ.

Замарожванне лініі фронту - гэта праблема для Кіева. «Статычная абарона рэдка бывае добрай ідэяй, бо яна скоўвае здольнасць войскаў манеўраваць… Навыкі і фізічная падрыхтоўка салдат могуць лёгка пагоршыцца, калі яны занадта доўга сядзяць у акопах», - гаворыцца ў артыкуле.

Менавіта таму, адзначаюць эксперты, УСУ абралі для сябе тактыку актыўнай абароны. Яна прадугледжвае, што ўкраінцы будуць адначасова і ўтрымліваць лінію фронту і вышукваць слабыя месцы супраціўніка для прарыву варожай абароны.

«Такая тактыка прывяла да нечаканага контрнаступу ў верасні 2022 года, падчас якога Кіеў вызваліў частку тэрыторыі ў Харкаўскай вобласці», - піша The Telegraph.