З беларускіх аптэк знікаў папулярны прэпарат

«Энтэрасгель» тры месяцы адсутнічаў у аптэках па ўсёй краіне.

Беларусы занепакоеныя знікненнем папулярнага кішэчнага сарбента «Энтэрасгель». Праблема дайшла да сацсетак, дзе пішуць, што не могуць знайсці прэпарат некалькі месяцаў.

«Энтэрасгель» тры месяцы адсутнічаў у аптэках па ўсёй краіне. Ён быў на перарэгістрацыі. У пачатку мая ў продажы ў Мінску з’явілася першая партыя прэпарата, — тлумачаць у адным з каментароў.

Аптэчны сэрвіс tabletka.by паказвае наяўнасць пасты «Энтэрасгель» расійскай вытворчасці ў трох аптэках БСТфарм у Мінску па цане 38,5 рубля. Судзячы па колькасці, указанай у пошукавым сэрвісе, прэпарата шмат — ад 120 да амаль 500 адзінак у наяўнасці.

У сацсетках людзі дзеляцца, як ратуюцца ад кішэчных інфекцый без звыклага прэпарата, ужываючы і кока-колу, і нават аналагічны прэпарат для жывёл.

Пры гэтым на перанесеную апошнім часам кішэчную інфекцыю скардзяцца ў розных гарадах.

«Салідарнасць» спытала спецыяліста, наколькі верагодная цяпер успышка кішэчных інфекцый і як дапамагчы без «Энтэрасгелю».

— У кішэчных інфекцый пік захворвання прыпадае на лета, — тлумачыць у экспрэс-каментары сямейны лекар Мая Церакулава. — Але кішэчныя інфекцыі, не толькі ротавірус, а 600 розных, цыркуляваюць у Беларусі пастаянна.

Яны ніколі не знікаюць і могуць быць рознымі, зусім не абавязкова, што ўсе хварэюць адной і той жа.

— Ці можна ў такім стане, як раяць некаторыя, ужываць колу або спрайт?

— Не абавязкова колу ці спрайт. Дапаможа любая рэгідратацыя, то-бок любая вадкасць.

Салодкія напоі суб’ектыўна могуць палягчаць стан слабасці, бо падчас хваробы чалавек мае дрэннае самаадчуванне, губляецца шмат калорый, ён не можа есці і папаўняць іх дэфіцыт.

Ідэальна падыходзяць у такіх выпадках рэгідратацыйныя растворы, асабліва для дзяцей, бо падчас кішэчных інфекцый мы губляем не толькі калорыі, але пры ванітах і дыярэі яшчэ і солі.

Адным з самых небяспечных ускладненняў у выпадку кішэчных інфекцый — абязводжванне, парушэнне водна-электралітнага балансу.

Для папаўнення соляў ёсць спецыяльныя рэгідратацыйныя растворы з аптэкі, напрыклад, «Нармагідрон» або «Рэгідрон». Можна ўжываць нейкія напоі для спартсменаў з электралітамі, нават расол з агуркоў — у прынцыпе, можна піць любую салёную вадкасць. Проста ў аптэчных парашках склад збалансаваны.

У любым выпадку першае, што трэба рабіць пры любых кішэчных інфекцыях пры страце фізіялагічных вадкасцяў, — кампенсаваць электраліты.

Акрамя таго, трэба шмат піць, і абсалютна ўсё роўна, што вы будзеце піць — колу, кампот, чай, курыны булён і г.д. — усё, акрамя малака.

Удакладню: калі не будзеце піць самі, усё можа скончыцца кропельніцай. Бо арганізму ў любым выпадку трэба папаўняць вадкасць.

Багатага пітва дастаткова, каб стала лягчэй. Трэба прадухіліць абязводжванне.

У другую чаргу можна прымаць сарбенты: актываваны вугаль, «Смекту», «Энтэрасгель» і яго аналагі — увогуле такіх прэпаратаў на рынку мноства.

Пры гэтым «Смекта» будзе мець мацнейшы эфект. Аднак у любым выпадку ўсе гэтыя прэпараты палягчаюць сімптомы, але не паскараюць выздараўленне.

— Пры якіх захворваннях яшчэ неабходны менавіта «Энтэрасгель»?

— Пераважна яго рэкамендуюць пры харчовых атручваннях, кішэчных інфекцыях, а таксама прызначаюць пры алергічных рэакцыях, пры харчовай гіперчуллівасці.

Аднак ва ўсіх гэтых выпадках таксама можна абраць любы сарбент, зусім не абавязкова гэты.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com