Эканоміка Украіны летась вырасла на 5,3%

Пра гэта паведаміў дзяржстат Украіны.

Летась рэальны валавы ўнутраны прадукт Украіны вырас на 5,3% пасля падзення на 28,8% у 2022 годзе. Пра гэта паведаміла Дзяржаўная служба статыстыкі ў чацвер, 28 сакавіка.

«Рэальны ВУП у 2023 г. у параўнанні з 2022 г. павялічыўся на 5,3%. Намінальны ВУП склаў 6537,8 млрд грн.», – гаворыцца ў паведамленні.

Паводле звестак Дзяржстата, у першым квартале 2023 года зніжэнне рэальнага ВУП у параўнанні з аналагічным перыядам 2022-га склала 10,3 адсотка, пасля чаго ў другім квартале ён вырас на 19,2 адсотка, у трэцім – на 9,6 адсотка і ў чацвёртым таксама вырас на 4,7%.