Стаматолаг і сантэхнік: хто выратаваў той самы рэйс у Тэль-Авіў

Сапраўдная галівудская гісторыя.

Самалёт FlyDubai, які ляцеў з Дубая ў Тэль-Авіў, 30 верасня ледзь не разбіўся пасля таго, як другі пілот напаў на камандзіра паветранага судна проста ў кабіне. Пазбегнуць трагедыі ўдалося дзякуючы дзеянням людзей на борце: разам яны змаглі абясшкодзіць нападніка і пасадзіць самалёт, піша «Медуза».

Нягледзячы на раненне, капітан Сміт Маччхар змог упусціць пасажыраў у кабіну

Пазбегнуць катастрофы найперш дапамог капітан судна. Ім аказаўся 39-гадовы грамадзянін Індыі Сміт Маччхар. Другі пілот нанёс яму нажавыя раненні, у тым ліку ў галаву і рукі, аднак Маччхар здолеў адкрыць дзверы кабіны — і пасажыры змаглі трапіць унутр і абясшкодзілі нападніка.

Цяпер Маччхар у бальніцы. Паводле інфармацыі Reuters, ён працуе ў авіяцыі каля 15 гадоў, а ў FlyDubai перайшоў у 2022 годзе. Адвагу Маччхара ўжо адзначыў прэм’ер-міністр Індыі Нарэндра Модзі: «Перад тварам вялізнай небяспекі і нягледзячы на сур’ёзныя раненні ён праявіў велізарную мужнасць і непахісную рашучасць абараніць жыцці іншых».

Сантэхнік Яніў Хаюн стабілізаваў самалёт

Калі дзверы кабіны адчыніліся, туды адным з першых увайшоў пасажыр Яніў Хаюн. Паводле яго слоў, паранены капітан ляжаў каля дзвярэй, а другі пілот знаходзіўся каля панэлі кіравання і біў па ёй. Хаюн выцягнуў яго з кабіны і паклікаў на дапамогу іншых пасажыраў, а затым сеў за штурвал і пацягнуў яго на сябе, каб вывесці з пікіравання.

The Guardian і прэзідэнт ЗША Дональд Трамп паведамляюць, што ізраільцянін Хаюн паводле прафесіі сантэхнік. Сам ён распавёў у інтэрв’ю, што ведаў алгарытм дзеянняў дзякуючы серыялу «Расследаванні авіякатастроф».

Два пасажыры — прафесійныя пілоты — пасадзілі самалёт

Калі самалёт удалося стабілізаваць, кіраванне прынялі прафесійныя пілоты — сярод пасажыраў рэйса аказаліся два пілоты FlyDubai. Яны пасадзілі борт у Саудаўскай Аравіі. Хто менавіта ўзяў на сябе кіраванне самалётам, дакладна невядома. Выданне Israel Hayom сцвярджала, што гэта грамадзянін Расіі і грамадзянін Украіны, аднак пакуль гэтая версія не пацвердзілася. Паводле іншай інфармацыі, адзін з пілотаў, якія пасадзілі самалёт, быў грамадзянінам Фіджы. Дакладна вядома толькі тое, што яны таксама працуюць у авіякампаніі FlyDubai.

Стаматолаг Шота Мусаеў аказаў дапамогу капітану

Адзіным урачом на борце быў стаматолаг з Ізраіля Шота Мусаеў. Ён аказаў першую дапамогу капітану, што, на яго думку, магло выратаваць жыццё Маччхару. «Калі я аказаўся ў кабіне, пілот быў у вельмі дрэнным стане, у яго быў моцны крывацёк у вобласці галавы», — распавёў Мусаеў.

Пасажыры Асаф Раджван і Цвіка Манес абясшкодзілі нападніка

Пасажыры 55 хвілін утрымлівалі другога пілота, каб ён не змог вярнуцца ў кабіну. Асаф Раджван, адзін з тых, хто дапамагаў абясшкодзіць нападніка, распавёў, што сам атрымаў лёгкае раненне. Іншы пасажыр, Цвіка Манес, паведаміў, што з другім пілотам змагаліся каля 20 хвілін, у выніку яго звязалі праваднымі навушнікамі.

Манес распавёў, што ляцеў гэтым рэйсам разам з дачкамі. У момант рэзкага зніжэння самалёта яны былі вельмі напалоханыя і крычалі, што не хочуць паміраць. «Для любога бацькі вельмі траўматычна пачуць такое», — сказаў ён.

Чаго мы дагэтуль не ведаем?

Асоба другога пілота не раскрываецца. Вядома толькі, што гэта грамадзянін Амана. Цяпер яго дапытваюць улады Саудаўскай Аравіі. Ізраіль таксама намерваецца дапытаць падазронага, паведаміў прэм’ер-міністр гэтай краіны Біньямін Нетаньяху.

Чаму ён учыніў напад, невядома. Ізраільскія ўлады разглядаюць версію, што другі пілот планаваў не проста разбіць самалёт, а здзейсніць тэракт па тыпу 11 верасня, накіраваўшы борт у адзін з хмарачосаў Тэль-Авіва, паведамілі крыніцы The Telegraph. Паводле звестак выдання, следства разглядае гэтую версію як асноўную. Нетаньяху заявіў, што Ізраіль мае намер высветліць, ці былі ў нападніка саўдзельнікі. Адказваючы на пытанне, ці мог да гэтага мець дачыненне Іран, Нетаньяху сказаў, што пра гэта «занадта рана казаць».

Якая зброя была выкарыстана падчас нападу, незразумела. У аэрапорце перад вылетам экіпаж праходзіць строгі дагляд, у тым ліку праз металадэтэктары. Нетаньяху дапусціў, што нападнік мог выкарыстоўваць аварыйную сякеру, якая захоўваецца ў кабіне на выпадак надзвычайных сітуацый.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com