WSJ: «Вагнер» вывозіць золата з Афрыкі ў Беларусь

Афрыканскім бізнесам групоўкі кіруе 28‑гадовы Павал Прыгожын.

Апошнія тры месяцы золата з Цэнтральнаафрыканскай Рэспублікі, здабычу якога кантралюе «Вагнер», адпраўляюць у Беларусь. Беларускі след апісаны ў матэрыяле WSJ пра 28‑гадовага спадкаемца заснавальніка «Вагнера». Выданне спасылаецца на чыноўнікаў, былых паплечнікаў вагнераўцаў і даследчыкаў іх дзейнасці.

Паводле выдання, у красавіку Павал Прыгожын сабраў у гатэлі ў сталіцы ЦАР Бангі прадстаўнікоў «Вагнера» і ўрада.

Яны абмяркоўвалі, як захаваць экспарт золата, пазбягаючы міжнароднага кантролю і абмінаючы рынкі Аб’яднаных Арабскіх Эміратаў.

Пасля перамоў міністр здабыўной прамысловасці ЦАР, паводле суразмоўцаў WSJ, пагадзіўся дапамагаць з дакументамі, якія прадстаўляюць золата як дзяржаўную ўласнасць. Згодна з дадзенымі чыноўнікаў і мясцовых даследчыкаў, апошнія тры месяцы гэтыя грузы накіроўваюцца ў Беларусь.

Павал Прыгожын атрымаў спадчыну пасля гібелі бацькі ў авіякатастрофе ў жніўні 2023 года — праз два месяцы пасля мяцяжу «Вагнера». Тады яму было 25 гадоў.

Раней яго ведалі як аматара прыватных самалётаў і раскошных яхтаў, але бацька загадзя рыхтаваў сына да кіравання сямейнымі справамі. Да 20 гадоў Павал Прыгожын кіраваў раскошнымі асабнякамі і маёмасцю сям’і, а пазней удзельнічаў у ваенных аперацыях у Сірыі і Украіне, дзе служыў аператарам беспілотнікаў і супрацоўнікам разведкі.

Цэнтрам яго цяперашняга бізнесу стала ЦАР. Паводле WSJ, пад камандаваннем Прыгожына знаходзіцца каля 500 наймітаў. Яны ахоўваюць прэзідэнта Фостэн-Арканжа Туадэру, ваююць супраць паўстанцаў і маюць уплыў у мясцовых сілавых структурах.

Прыгожын рэгулярна прылятае ў Бангі з Пецярбурга і спыняецца ў гатэлі Ledger Plaza, які фактычна служыць яго штабам. Узброеная ахова правярае нават высокапастаўленых чыноўнікаў, што прыходзяць на сустрэчы.

Паводле ацэнкі Global Initiative Against Transnational Organized Crime, кошт гадавой здабычы на найбуйнейшым залатым рудніку, які кантралюе групоўка, дасягае 250 мільёнаў долараў.

Агульныя штогадовыя паступленні сямейнага бізнесу — легальнага і крымінальнага — даследчыкі ацэньваюць больш чым у 400 мільёнаў долараў.

Акрамя золата, структуры Прыгожына, паводле расследавання, зарабляюць на пастаўках зброі ўзброеным групоўкам у Судане і Лівіі, вытворчасці піва і гарэлкі, а таксама кантралююць значную частку мясцовага рынку трамадала — апіоіднага абязбольвальнага.

Пасля смерці Яўгена Прыгожына Масква спрабавала падпарадкаваць афрыканскія аперацыі «Вагнера» Міністэрству абароны праз створаны «Афрыканскі корпус». Аднак у ЦАР яго сын захаваў кантроль: паводле дыпламатаў, Туадэра сам прасіў Крэмль не замяняць вагнераўцаў расійскімі вайскоўцамі.

Даследчыкі дапускаюць, што Павал Прыгожын мог дамовіцца з Крэмлём пра працяг працы. Пры гэтым структуры «Вагнера» па-ранейшаму фінансуюць у ЦАР прарасійскую прапаганду.

Беларусь і раней звязвалі з афрыканскай лагістыкай «Вагнера». У лістападзе 2023 года iSANS паведамляў пра рэйс Іл‑76 з Бабруйска ў Бангі, а ў верасні 2024‑га быў пералёт з Оршы ў сталіцу ЦАР. Даследчыкі меркавалі, што самалёты маглі перавозіць наймітаў або іх маёмасць.

Пасля мяцяжу Яўгена Прыгожына ў чэрвені 2023 года частка наймітаў перабазавалася ў Беларусь. У ліпені Міністэрства абароны Беларусі афіцыйна паведаміла, што вагнераўцы навучаюць беларускія тэрытарыяльныя войскі пад Асіповічамі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com