У Смалявічах жанчына не змагла трапіць на прыём да тэрапеўта — не хапіла талонаў
- 17.11.2026, 14:51
У паліклініцы паспрабавалі апраўдацца.
Жыхарка Смалявіч не змагла атрымаць талон, каб трапіць на прыём да лекара-тэрапеўта ў мясцовай паліклініцы. Пра гэта жанчына распавяла на сваёй старонцы ў Threads. У адміністрацыі медустановы пракаментавалі скаргу пацыенткі, адзначае «Зеркало».
Жыхарка Смалявіч прыйшла ў мясцовую паліклініку 13 лістапада, каб забраць вынікі аналізаў.
«На дзвярах [кабінета] запіска: „Звяртайцеся ў тэрапію, паехала на вакцынацыю“. А куды ў тэрапію? Іду да старшай медсястры даведацца, як забраць вынікі аналізаў, яна мне кажа: „Ідзіце да свайго тэрапеўта“. Кажу ёй, што талон не даюць. Пайшла яна сама шукаць вынікі аналізаў. Талона да тэрапеўта мне няма. У мамы талон на 13:37. Прыйшлі мы каля 13:15. Людзей няма, прынялі маму без чаргі. Вынік: талонаў няма, а людзей яшчэ больш няма», — напісала беларуска.
Wyświetl w Threads
Сітуацыю пракаментавала намесніца галоўнага ўрача Смалявіцкай цэнтральнай раённай бальніцы Марыя Шаранова.
Марыя Шаранова адзначыла, што праблемы з талонамі да тэрапеўтаў узніклі з-за вакцынацыйнай кампаніі. Лекары і памочнікі лекара аддзялення рэгулярна выязджаюць у арганізацыі і на прадпрыемствы раёна, каб прышчапляць работнікаў на месцах.
Калі лекар знаходзіцца на выездзе, запісацца да яго ў паліклініцы фактычна немагчыма — адсюль і дэфіцыт талонаў у пэўныя дні, патлумачыла Марыя Шаранова.
Пры гэтым яна падкрэсліла, што для пацыентаў з вострымі станамі (тэмпература, скачкі ціску, траўмы, укусы кляшчоў) і для тых, хто знаходзіцца на бальнічным лісце або даведцы, «прадугледжаны дадатковыя талоны».