«Міжнародная амністыя» прызнала яшчэ аднаго беларуса вязнем сумлення
3- 12.11.2009, 9:29
Праваабарончая арганізацыя «Міжнародная амністыя» прызнала вязнем сумлення Ігара Коктыша, які знаходзіцца ў сімферопальскім СІЗА ў чаканні экстрадыцыі ў Беларусь.
30-гадовы Ігар Коктыш абвінавачваецца беларускай пракуратурай у наўмысным забойстве. З 25 чэрвеня 2007 года ён знаходзіцца ў СІЗА на тэрыторыі Украіны і чакае экстрадыцыі, паведамляе «Радыё Свабода».
«Міжнародная амністыя» звярнулася да ўкраінскіх уладаў з просьбай не выдаваць беларускаму боку Ігара Коктыша.
Крымінальную справу супраць баранавіцкага музыкі і стваральніка гуманітарнай асацыяцыі імя святога Яна Боска распачалі ў студзені 2001 года. Яго абвінавацілі ў забойстве сваяка блізкага сябра.
Лідэр групы «Млечны шлях» дзесяць месяцаў правёў у баранавіцкім СІЗА.
Ён казаў, што там яго катавалі, пакідаючы голага ў халоднай камеры, не даючы лекаў супраць астмы, і часта збівалі. 7 снежня 2001 года Берасцейскі раённы суд прызнаў яго невінаватым. На судзе сведкі казалі, што на момант забойства Ігар Коктыш знаходзіўся ў іншым горадзе.
У красавіку 2002 года пракуратура апратэставала рашэнне і вярнула справу на перагляд у Берасцейскі суд.
Ігар Коктыш у той час ужо знаходзіўся ва Украіне і вырашыў не вяртацца ў Беларусь.
Ва Украіне яго затрымалі мясцовыя супрацоўнікі міліцыі. 25 красавіка 2007 года змясцілі ў камеру сімферопальскага СІЗА да экстрадыцыі ў Беларусь.
У кастрычніку 2007 года Еўрапейскі суд па правах чалавека забараніў Украіне перадаваць арыштаванага беларускаму боку, а «Міжнародная амністыя» адначасова правяла акцыю тэрміновай дапамогі, звярнуўшыся да ўкраінскіх уладаў з патрабаваннем не дазволіць экстрадыцыю.
У 2008 годзе ва Упраўленне Вярхоўнага Камісара ААН па справах уцекачоў звяртаўся Аляксандр Мілінкевіч з просьбай пасадзейнічаць Ігару Коктышу ў даванні ва Украіне статусу палітычнага ўцекача.
