Медыкі хаваюць ад журналістаў статыстыку смерцяў ад пнеўманіі
22- 13.11.2009, 11:50
Прадстаўнікі рэгіянальных СМІ не могуць атрымаць ад медыкаў афіцыйнай статыстыкі пра сітуацыю з захворваннямі на вірусныя інфекцыі.
Галоўны урач Баранавіцкай цэнтральнай паліклінікі Аляксандр Сцяцко адмовіўся называць газеце «Intex-press» колькасць памерлых у Баранавічах ад пнеўманіі сёлета.
Рэдакцыя «Intex-press» даведалася пра выпадак смерці маладой жанчыны ў Баранавічах ад гэтай хваробы. Аднак спробы ўдакладніць, ці быў гэта першы выпадак смерці сёлета, не далі выніку, паведамляе прэс-служба БАЖ. Аляксандр Сцяцко, які пацвердзіў факт смерці жанчыны, у размове з карэспандэнтам «Intex-press» 12 лістапада адмовіўся казаць, ці былі ў Баранавічах сёлета падобныя выпадкі.
З падобнай рэакцыяй медыкаў сутыкнуліся і ганцавіцкія калегі. Галоўурач Ганцавіцкага цэнтральнага раённага шпіталя ў тэлефонай размове з карэспандэнтам «Ганцавіцкага часу» пацвердзіў тры выпадкі смерці ад пнеўманіі на гэтым тыдні, аднак адмовіўся паведаміць, колькі пацыентаў з такім дыягназам зараз праходзяць лячэнне.
